Россия ишчи кучи танқислигини Мянмадан мигрантларни жалб этиш орқали қопламоқчи

Россия ишчи кучи етишмовчилигига қарши курашиш учун янги давлатлардан меҳнат мигрантларини жалб этиши керак. Бу ҳақда мамлакат иқтисодиёт вазири Максим Решетников маълум қилди.

«Биз мигрантларни жалб этишга ўрганиб қолган фақат учта давлатга эътибор қаратишимиз керак эмас. Мутлақо янги давлатларни қараш керак, чунки дунёда фаол, хотиржам ва онгли равишда ўз меҳнат ресурсларини экспорт қилаётган давлатлар жуда кўп. Биз ҳам бунга тайёр туришимиз лозим», — дейди Решетников.

Иқтисодиёт вазири бунга мисол сифатида Мянмани келтирган — аҳолиси 55 миллионга етадиган мамлакатнинг хорижда 6 миллион меҳнат мигранти бор. «Биз ҳам улар билан шуни муҳокама қиляпмиз», — дейди Решетников. Таъкидланишича, 4 март куни бош вазир Мин Аун Хлайн бошчилигидаги Мянма делегацияси Россияга ташриф буюради.

Россияда кадрлар муаммоси 2022 йилда Украинага қарши кенг кўламли уруш бошланганидан кейин юзага келди. Жанговар ҳаракатларнинг дастлабки кунларидан мамлакатдаги меҳнатга яроқли 300 минг эркак фронтга юборилди, шунингдек, 650 минг — 1,1 миллион россиялик сафарбарлик ва урушдан қочди. Охирги икки йилда яна 700 минг киши Мудофаа вазирлиги билан шартнома имзолаган ва урушга йўл олган.

Ўтган йилнинг кузида РФ президенти Владимир Путин Россияда ишчи кучи етишмаётганини маълум қилиб, иқтисодиётни ривожлантиришда «буни эътиборга олиш кераклиги»ни таъкидлади. Марказий банк ҳисоб-китобларига кўра, 2024 йил ўрталарида Россияда кадрлар етишмовчилиги бутун кузатувлар давомида рекорд кўрсаткичга чиққан — компанияларнинг ходимлар билан таъминланганлик индекси 30,8 банд пастга қулаган.

Олдинроқ Россия Хитой, Ветнам, Ҳиндистон, Туркия ва Африка давлатларидан меҳнат мигрантларини жалб қилишни бошлаганди. Шунингдек Россия компаниялари Кения, Зимбабве, Камерун, Замбия, Жазоир, Серра-Леоне ва Марказий Африка Республикасидан ишчиларни ёллашга уринмоқда.