Россия БМТ ва АҚШга Украина томонидан ҳужумга учраган объектлар рўйхатини топширди

Россия БМТ ва АҚШга мораторий бошланганидан бери Украина томонидан ҳужумга учраган объектлар рўйхатини топширди.

Бу ҳақда Россия Tашқи ишлар вазири Сергей Лавров маълум қилди.

"Биз Россия Мудофаа вазири Андрей Белоусов Хавфсизлик кенгаши йиғилишида келтирган қоида бузилиши ҳолатлари рўйхатини Қўшма Штатлар президентининг миллий хавфсизлик бўйича маслаҳатчиси Майк Уолсга ва АҚШ Давлат котиби Марко Рубиога етказдик, шунингдек, уни БМТ ва ЕХҲТдаги вакилларимизга ҳам юбордик. Улар бу маълумотлар асосида Украина ҳукумати ваъдасининг нақадар ишончсиз эканини кўрсатиб бериши мумкин", — деди Лавров.

Россия Ташқи ишлар вазирининг таъкидлашича, Москва Украина томонидан қилинаётган қоидабузарликларга қарамай, келишувга амал қилишда давом этмоқда.

Эслатиб ўтамиз, аввалроқ Украина ҳам Россия энергия объектларига зарба беришни вақтинчалик тўхтатиш бўйича келишувга амал қилмаётганини маълум қилган эди.