Рождество арафасида терактлар уюштиришда гумон қилинган доғистонлик эркак Венада ўз жонига қасд қилди. У Россияга жўнатилишидан бир неча соат олдин ўзини осган

Терроризмда гумон қилинган 40 ёшли Доғистонлик фуқаро Россияга депортация қилинишидан бир неча соат олдин Венадаги полиция марказида ўз жонига қасд қилди. Бу ҳақда Bild хабар бермоқда.

Нашрнинг ёзишича, эркак ошхона сочиқ ва туфли боғичидан фойдаланиб ўзини осган. Ушбу қарорнинг сабаблари ҳақида ҳеч нарса маълум эмас: йигит 11 июль куни эрталаб соат олтида уйига юборилиши керак эди.

Bild нашрининг ёзишича, доғистонлик фуқаро Кёльн собори, шунингдек, Венадаги Авлиё Стефан соборида теракт уюштиришни режалаштирганликда гумон қилинган. Тергов маълумотларига кўра, унинг шериклари эр-хотин ва асли тожикистонлик немис бўлган. Ҳужумлар Рождество ва Янги йил арафасида амалга оширилиши режалаштирилган эди, бироқ ҳужумчилар бир неча кун олдин Австрия ва Германияда қўлга олинган.

Маълумки, россиялик Афғонистондаги "Толибон" билан рақобатлашувчи "Исломий давлат" бўлими бўлган "Хуросон вилояти" аъзоси бўлган. Айнан шу гуруҳ жорий йилнинг март ойида "Крокус Сити Холл"да содир этилган теракт учун жавобгарликни ўз зиммасига олган эди.

23 декабрь куни Bild нашри Австрия, Германия ва Испания хавфсизлик органларига янги йил ва Рождество байрамларида исломий террорчилар гуруҳи бир нечта терактлар тайёрлаётгани ҳақида маълумот олгани ҳақида хабар берди. Бунга Кёльн, Вена ва Мадриддаги Рождество маросимлари пайтида черковларга ҳужум қилиш хавфи ҳақидаги хабарлар киради. Бироқ, 2 январь куни Германия полицияси Кёльн соборида теракт тайёрлашда гумон қилиниб, қўлга олинган беш нафардан учтасини қўйиб юборгани маълум бўлди. Бешинчи маҳбус ким эканлиги номаълум.