Рим папаси саратон операциясидан сўнг Ватиканга қайтди

Рим папаси Лео ХИВ ўпка саратони жарроҳлик амалиётидан тўрт кун ўтиб, 17 октябрь куни тушдан кейин Римдаги касалхонадан чиқди ва Ватиканга қайтди. Бу ҳақда Reuters хабар берди.

71 ёшли Папа Римдаги Жемелли касалхонаси ташқарисида тўпланган оломонга қўл силкиди ҳамда ўзи мустақил равишда машинагача юриб борди. У тўхтаб, Италияда саратондан даволанаётган украиналик 13 ёшли Варвара исмли қизча билан гаплашди. Қора автомашинасида касалхонани тарк этаётганида у очиқ деразадан самимий табассум қилиб яна қўл силкиди.

17 октябрь куни эрталаб шифокорлар сўнгги қон таҳлиллари ва кўкрак қафаси текширувидан сўнг папанинг уйга қайтиши учун аҳволи етарлича яхши эканини билдирди. У кундалик ишларини мустақил равишда бажара олмоқда.

Папанинг ўпкаси 13 октябрь куни операция қилинганди. Лео ХИВ 18 октябрь куни тушда Авлиё Пётр майдонида зиёратчилар билан ҳар ҳафталик ибодатни ўтказиши кутилмоқда. Бу унинг операциядан кейинги биринчи оммавий тадбири бўлади.

Нисбатан ёш ва энергияга бой деб ҳисобланадиган папанинг бундай хасталикка чалингани кўпчиликни ҳайратда қолдирди ва унинг келажакдаги фаолияти бўйича саволларни ўртага ташлади.

Папанинг шифокорлари операция муваффақиятли ва асоратсиз ўтганини айтди. Бироқ улар ўсма ҳажмини ёки касаллик атрофдаги лимфа тугунларига тарқалган-тарқалмаганини ҳали ошкор қилмади.

Ватикан 16 октябрь куни папа ўз мажбуриятларини бажаришда давом этиш ниятида эканини маълум қилди. Шу билан бирга, баъзи кардиналлар папанинг саломатлиги борасида очиқча хавотир билдира бошлаган.

Папанинг ишга қайтганининг белгиси сифатида, у 16 октябрь куни Россия президенти Владимир Путин билан телефонда мулоқот қилди.

Ватикан давлат котиби кардинал Петро Паролин папанинг келажакдаги иш жадвали саломатлигига қараб мослаштирилиши мумкинлигини айтди. Ватикан папанинг операциядан кейинги биринчи суратларини ҳам эълон қилди. Унда Папанинг мустақил тик тургани ва ибодат маросимини ўтказаётгани акс этган.