Режимни мустаҳкамлаш ва Россияни жиловлаш: нима учун Си Цзиньпин Шимолий Кореяга ташриф буюрди?

Шимолий Кореяга етти йилдан кейин амалга оширган биринчи ташрифи халқаро майдонда катта қизиқиш уйғотди. Хитой раиси Си Цзиньпиннинг Пхеньянга келган Си Цзиньпин ва Ким Чен Ин икки давлат ўртасидаги «енгилмас дўстлик»ни яна бир бор таъкидлади.

Таҳлилчилар фикрича, мазкур ташрифнинг бир нечта муҳим сабаблари бор.

Аввало, Пекин Шимолий Кореяни ўзининг стратегик таъсир доирасида сақлаб қолишни истамоқда. Сўнгги йилларда Пхеньян Россия билан ҳарбий ва сиёсий ҳамкорликни сезиларли даражада кучайтирди. Украинадаги уруш фонида Москва ва Пхеньян ўртасидаги яқинлашув Хитойни эҳтиёткорликка ундамоқда. Си Цзиньпин ташрифи орқали Хитой Ким Чен Инга Пекин ҳамон унинг асосий ҳамкори эканини эслатмоқчи бўлди.

Иккинчидан, ташриф Ким Чен Ин режими учун муҳим сиёсий қўллаб-қувватлаш ҳисобланади. Халқаро санкциялар ва иқтисодий қийинчиликлар шароитида Хитой раҳбарининг Пхеньянга келиши Шимолий Корея раҳбариятининг халқаро майдонда яккаланиб қолмаганини кўрсатади.

Учинчидан, Хитой минтақада АҚШ ва унинг иттифоқчилари фаоллигининг ортишига қарши умумий фронт шакллантиришга интилаётган бўлиши мумкин. Си Цзиньпин ташриф олдидан эълон қилинган мақоласида «гегемония», «авторитар босим» ва «милитаризмнинг қайта тикланиши»га қарши курашиш зарурлигини таъкидлади. Бу баёнотлар Вашингтон ва унинг Осиёдаги иттифоқчиларига ишора сифатида баҳоланмоқда.

Шунингдек, кузатувчилар фикрича, ташриф давомида иқтисодий ҳамкорлик, чегара савдоси, транспорт алоқалари ва хавфсизлик масалалари муҳокама қилиниши мумкин. Бироқ Шимолий Кореянинг ядровий дастури бўйича жиддий ўзгаришлар кутилмаяпти, чунки Пхеньян ўзининг ядровий мақомидан воз кечиш ниятида эмас.

Си Цзиньпиннинг ташрифи Пекинда АҚШ президенти Дональд Трамп ва Россия президенти Владимир Путин билан учрашувлардан кўп ўтмай амалга оширилгани ҳам унинг геосиёсий аҳамиятини янада оширмоқда. Бу ташриф Хитойнинг Шарқий Осиёдаги таъсирини мустаҳкамлаш, Шимолий Корея билан иттифоқчилик муносабатларини намоён этиш ва минтақадаги кучлар мувозанатига таъсир кўрсатишга қаратилган муҳим дипломатик қадам сифатида баҳоланмоқда.