Қуруқликдаги нефть захиралари ортмоқда

Жаҳон нефть захиралари кетма-кет иккинчи ой ортиб бормоқда. Бу маълумотлар Халқаро энергетика агентлигининг сўнгги ҳисоботида келтирилган.

Энергия назорати ташкилотининг маълумотларига кўра, глобал нефть захиралари кетма-кет иккинчи ойда ортиб, март ойида 7,7 миллиард баррелга етди. Шу муносабат билан агентлик жорий йилда нефть захиралари кунига ўртача 720 минг баррелга, келгуси йилда эса 930 минг баррелга ошишини тахмин қилмоқда.

Апрель ойининг ўрталаридан май ойининг ўрталарига қадар қуруқликдаги глобал хом нефть захиралари 100 миллион баррелдан кўпроққа ошиб, 3,127 миллиард баррелга етди. Франциянинг Kayrros геоаналитик компанияси эксперти Августин Пратнинг сўзларига кўра, бу COVID-19 пандемиясидан кейин қуруқликдаги заҳираларнинг энг катта ўсишидир.

Дунёнинг энг йирик нефть импортчиси Хитойда май ойида нефть захиралари рекорд даражадаги 1,127 миллиард баррелга етди. Бу, эҳтимол, ҳукумат ва нефть компаниялари ўртасида нефть нархи паст бўлган даврда заҳираларни тўплаш бўйича келишувга боғлиқ.

Сўнгги пайтларда денгиз танкерларида сақланаётган нефть ҳажмининг ортиб бораётгани ҳам хавотирга сабаб бўлмоқда. Kpler маълумотларига кўра, 7 кундан ортиқ танкерларда сақланадиган хом нефть, конденсат ва нефть маҳсулотлари ҳажми ўтган ойда 14 фоизга ошиб, 160 миллион баррелга етди. Бу ҳам охирги 2 йилдаги энг юқори кўрсаткичдир.