“Қирғиз ҳукумати қарз олишни истамади, темирйўл қурилиши шу августдаёқ бошланади” – эксперт

Марказий Осиё халқаро институти эксперти Турдиқул Бўтаяров фикрича, Хитой-Қирғизистон-Ўзбекистон темирйўли қурилишининг тўхтаб қолишига маблағ етмагани, молиялаштириш масалаларидаги муҳокамалар сабаб бўлган. Гигант давлатларнинг бунга таъсири йўқ, шу йилнинг август ойидан қуриш бошланади, дейди у.

Ўзбекистон ва Қирғиз Республикаларининг амалдаги раҳбарияти икки ўртадаги чегара ва ҳудуд муаммоларига деярли нуқта қўйган. Расмий Тошкент Жапаров даврида Бишкек билан тил топиша олди. Қирғизистон президентининг ўзи ҳам давлатлар ер талашувидан чарчаганини, низоларни ҳал қилиш, муаммоларни ечиш пайти келганини Тошкентга ташрифи чоғида айтганди. Ҳозир ҳукуматлар яна бир муҳим лойиҳа – Хитой–Қирғизистон–Ўзбекистон темирйўли устида ишламоқда. 2022 йилнинг сентябрида бунга старт берилган бўлса-да, ҳали-ҳануз қурилиш ишлари бошланмаган.

Эксперт доиралари вакиллари темирйўл қурилишининг пайсалга солинишини Россиянинг Бишкек воситачилигидаги таъсири билан боғлайди. Чунки бу темирйўл қурилса, савдо ортидан минтақада Хитойнинг таъсири ортиб кетиш эҳтимоли юқори.

9 июл куни Марказий Осиё халқаро институтида Ўзбекистон ва Қирғизистон алоқаларига бағишланган конференцияда ҳам бу асосий мавзулардан бўлди. Унда қатнашган эксперт Турдиқул Бўтаяров фикрича, расмий Бишкек молиялаштириш масалаларини жиддий ўйлади. Қарз олишни истамади. Жараённинг тўхтатилишига Россия таъсири омилини эса сиёсатшунос “эски пайтнинг гапи” дея баҳолади.