Қатар АҚШнинг Эронга эҳтимолий зарбаларини икки ҳафтага кечиктиришга эришди

Қатар АҚШнинг Эронга қарши ҳарбий зарбаларни қайта бошлаши эҳтимолини камида икки ҳафтага кечиктиришга эришди. Бу томонларга келишмовчиликларни дипломатик йўл билан ҳал қилиш учун қўшимча вақт бериш мақсадида амалга оширилди.

Бу ҳақда Қатар Бош вазири, ташқи ишлар вазири шайх Муҳаммад бин Абдулраҳмон Ол Соний Парижда бўлиб ўтган «Катта еттилик» (G7) давлатлари ташқи ишлар вазирлари учрашувида маълум қилган.

Нашрнинг дипломатик манбаларига кўра, Қатар ҳукумати раҳбари воситачилик ҳаракатлари давом этаётганига қарамай, Вашингтон ва Теҳрон ўртасида жиддий келишмовчиликлар сақланиб қолаётганини билдирган.

Жумладан, томонлар эҳтимолий келишувларни амалга ошириш кетма-кетлиги бўйича ҳозирча бир тўхтамга келмаган. Бу масалалар қаторига денгиз блокадасини бекор қилиш, Эроннинг ядровий дастури билан боғлиқ муаммоларни ҳал этиш ҳамда Эрон активларини муздан тушириш киради.

Шу билан бирга, Қатар Ташқи ишлар вазирлигининг оммавий ахборот воситалари ва коммуникациялар департаменти директори Иброҳим Султон ал-Ҳошимий 10 ноябрь куни бўлиб ўтган брифингда АҚШ ва Эрон ўртасидаги музокараларда силжиш борлигини маълум қилди.

Унинг сўзларига кўра, оммавий ахборот воситаларида ҳарбий ҳаракатлар қайта бошланиши мумкинлиги ҳақида хабарлар тарқалаётганига қарамай, Доҳа Вашингтон ва Теҳроннинг дипломатик йўл билан келишувга эришишга содиқлигини тасдиқловчи ижобий баёнотларини қайд этмоқда.

Ал-Ҳошимий воситачилар томонларнинг позицияларини яқинлаштириш бўйича фаол саъй-ҳаракатларни давом эттираётганини таъкидлади.

Шунингдек, у Қатар Бош вазирининг 10 ноябрь куни Оқ уйда АҚШ президенти Дональд Трамп билан учрашуви ижобий руҳда ўтгани ва музокаралар жараёнини илгари суриш масалаларига бағишланганини маълум қилди.