Бугун 29 март, 2024 йил, жума

O'ZB

Қамашида 28 ёшли эркак 12 ёшли қизни ярим тунда ўғирлаб кетиб, зўрламоқчи бўлди (ВИДЕО)

Қамашида 28 ёшли эркак 12 ёшли қизни ярим тунда ўғирлаб кетиб, зўрламоқчи бўлди (ВИДЕО)

Қамаши тумани «Қовчин» маҳалласи Манғит қишлоғида истиқомат қилувчи фуқаро Ш.К 28 августдан 29 августга ўтар кечаси қишлоқда истиқомат қилувчи 2009 йилда туғилган қизни ўғирлаб кетди. Бу ҳақда «Nasafnews» мухбири хабар бермоқда.

Маълум бўлишича, 1993 йилда туғилган эркак Ш.К. қизнинг ўз ҳовлиси супасида ухлаб ётган вақтда кўрпага ўраб, пахта даласига ўғирлаб қочган.

Воқеа ҳақида қизнинг онаси шундай дейди:

«Қизимнинг айтиши бўйича, у эркак қизимни оғзини ёпиб, кўрпага ўраб кўтариб кетган. Қизим қўрқиб уйғониб, ‘кимсан, нима учун мени оғзимни ёпяпсан’ деганда, ‘агар бақирсанг, ҳозир пичоқлаб ўлдириб ташлайман’ деб қўрқитган. Йўлда қизим типирчилаб, қочмоқчи бўлган. Шунда қизимга тарсаки тушириб, судрай бошлаган. Кейин эса ‘ечинасан’ деб қизимнинг бошига ҳам урган»,- дейди қизнинг онаси С.Э.

12 ёшли қиз онасининг сўзларига кўра, ўғирлик қилган эркак Ш. К. шу куни жуда кўп миқдорда спиртли ичимлик истеъмол қилган бўлган. Қизалоқ пахта даласидан қочиб, уйига қайтиб келиб, онасини уйғотган ва бўлган воқеани онасига айтиб берган.

«Эртаси куни қизимни шифокорларга кўрсатдим. Экспертиза натижаларига кўра, қизим соғлом экан. Фақат мия чайқалиши ва боши ҳамда қулоғидан лат егани ва шикастлангани маълум бўлди».

«Оллоҳимга минг шукур, қизим ўша номарднинг қўлидан қочиб қутулди. Лекин ҳозирги аҳволи яхши эмас. Икки кундан бери овқатлангани йўқ. Нон берсак емайди, ‘кўнглим айнийди’ деб айтяпти. Ухла десам, фақат ётади. Ухлай олмайди»,- дея гапиради қизнинг онаси.

«Ҳамма менга қизингни номусини ўйламадингми, деб айтди»

«Ҳамма менга гапиряпти, ‘қизингизни келажагини ўйланг’ деяпти. Мен нега яшириб ўтиришим керак экан? Менинг эрим ҳали ҳам ҳар куни ёнимда. Ҳеч қаерга кетгани йўқ. Аммо бошқаларнинг турмуш ўртоғи Россияга ишлагани кетган. Тошкентга кетганлари бор. Ойликка ишлайди, 15 кунда бир келадигани бор. Эртага у номард мендан ўтиб бошқаларнинг болаларига кўз олайтирмайдими? Мен қандай қилиб бу жиноятни ёпиб ўтиб кетишим керак? Мен бу ҳолатни ошкор қилишим керак. Ўзбекистонда шундай одам бор. Билиб қўйишсин. Мен буни ёполмайман. Жазосини олиши керак у эркак»,- дейди қизнинг онаси С.Э.

«Nasafnews» мухбири ҳолат юзасидан Қашқадарё вилоят Ички ишлар бошқармаси ахборот хизмати рҳбари Ирода Расулова билан суҳбатлашди.

Маълум бўлишича, С.Э.нинг 2021 йил 29 август куни туман ИИБ бошлиғи номига ёзган аризаси туман ИИБ навбатчилик қисмида белгиланган тартибда рўйхатга олиниб, Қамаши туман ИИБ ҳузуридаги тергов бўлими томонидан терговга қадар текширув ҳаракатлари олиб борилган.

«Олиб борилган терговга қадар текширув жараёнида фуқаро Ш.К.нинг ҳаракатларида Ўзбекистон Республикаси ЖКнинг 277-моддаси 1-қисмида ва бошқа моддаларида назарда тутилган жиноят аломатлари аниқланганлиги сабабли, мазкур ҳолат юзасида Қамаши туман ИИБ ҳузуридаги тергов бўлими томонидан юқоридаги моддалар билан фуқаро Ш.К.га нисбатан жиноят иши қўзғатилган. Жиноят ишида гумон қилинувчи Ш.К Ўзбекистон Республикаси ЖПКнинг 221-моддаси тартибида ушланган. Ҳозирда ушбу жиноят иши юзасидан Қамаши туман ИИБ ҳузуридаги тергов бўлими томонидан дастлабки тергов ҳаракатлари олиб борилмоқда»,- дейди биз билан суҳбатда Ирода Расулова.

«Nasafnews» ҳолат юзасидан қизнинг онасидан видеоинтервью ҳам олган. Видеода воқеа ҳақида аниқ ва кўпроқ маълумот берилади.

Киритилди: 17:25 03.09.2021. Ўқилди: 15512 марта. Фикрлар сони: 17 та.
telegram channel

Бўлимга тегишли қизиқарли хабарлар

Энг кўп ўқилган янгиликлар

бир кунда ҳафтада бир ойда

Фикр билдириш учун қайдномадан ўтишингиз сўралади ва телефон ракамни тасдиклаш керак булади!