Қирғизистон миллий хавфсизлик давлат қўмитаси собиқ раиси Қамчибек Ташиев давлат тўнтаришига уринишда айбланди

Бу ҳақда адвокат Шердор Абдиқапаровга таяниб “24 kg” нашри хабар берди.

Маълум қилинишича, Ташиевдан ташқари собиқ депутат Курманкул Зулушев ва Жогорку Кенешнинг (парламент) собиқ спикери Нурланбек Турғунбек ўғлига ҳам айблов эълон қилинди. Улар ҳам илгари ишнинг бошқа иштирокчиларига қўлланган моддалар билан айбланган.

"Гап оммавий тартибсизликларни ташкил этиш ва тергов томонидан давлат тўнтаришига уриниш сифатида баҳоланаётган оғир жиноятлар ҳақида бормоқда", дейилади хабарда.

Ҳуқуқ-тартибот идораларидаги манбаларга кўра, гумонланувчилар Қирғизистон Ички ишлар вазирлиги Тергов бош бошқармасида сўроқ қилинган. Сўроқ жараёни бир неча соат давом этган, шундан сўнг улар идора биносини тарк этган.

Айблов тафсилотлари ва тергов жараёни расман ошкор этилмаяпти. Манбаларга кўра, иш “75 мактуб” деб аталган мурожаат билан боғлиқ. Феврал ойида 75 киши президент Садир Жапаров ва Жогорку Кенеш раисига муддатидан олдин президентлик сайловларини ўтказишни сўраб мурожаат йўллаганди. Мурожаат муаллифлари кейинчалик қўлга олиниб, айримларига жиноий иш очилган.

Қамчибек Ташиев 2026 йилнинг феврал ойида Қирғизистон МХДҚ раиси лавозимидан бўшатилган. Қирғизистон президенти Садир Жапаров Ташиев энди ҳеч қачон давлат хизматига қайтмаслигини эълон қилган. Жапаров, шунингдек, Ташиевни ишдан олишини “Қирғизистон жамиятида бошбошдоқлик юзага келишининг олдини олиш” билан изоҳлаган эди.