Путин: Трамп 2020 йилги сайловларда алданган

Россия президенти Владимир Путиннинг фикрича, Дональд Трамп 2020 йилги АҚШ президентлик сайловларида адолатсизликка дуч келган.

Санкт-Петербург халқаро иқтисодий форуми (СПИЭФ) ялпи мажлисида сўзлаган Путин сайлов жараёнида қонунбузарликлар бўлган деб ҳисоблашини билдирди.

«Агар у (Трамп) сайловларда алдалмаганида... Менимча, ўша сайловларда аниқ қонунбузарликлар бўлган. Почта орқали овоз бериш ҳеч қандай халқаро стандартларга жавоб бермайди. Ўшанда унга ҳокимиятга келиш имкони берилмаган эди. Агар у ҳокимият тепасида бўлганида, бу (Украина можароси) содир бўлмас эди», — деди Путин.

Россия раҳбари, шунингдек, Дональд Трамп Украинадаги можарони ҳал қилиш масаласида Жо Байден бошчилигидаги аввалги АҚШ маъмуриятига нисбатан кўпроқ тинч йўл билан ечим топишга интилган бўлиши мумкинлигини таъкидлади.

Путиннинг мазкур баёноти унинг аввал ҳам бир неча бор билдирган позициясини такрорлайди. Бироқ 2020 йилги АҚШ президентлик сайловлари натижалари мамлакат судлари, штат сайлов комиссиялари ва федерал идоралар томонидан тасдиқланган. Сайловларда кенг кўламли сохталаштириш бўлгани ҳақидаги даъволарни тасдиқловчи далиллар расман аниқланмаган.