Пентагон: Иттифоқчилар кўпроқ пул тўлашлари керак

АҚШ Мудофаа вазири Пит Хегсетнинг айтишича , Доналд Трамп маъмурияти Шимолий Атлантика альянсини қўллаб-қувватлашда давом этмоқда, шу билан бирга НАТОга аъзо барча давлатлар ҳарбий харажатларини ошириш зарурлигини таъкидлади.

Бу ҳақда Хегсет Брюсселда НАТО бош котиби Марк Рютте билан қўшма матбуот анжуманида айтиб ўтди. Унинг сўзларига кўра, Вашингтон ҳамон НАТОни глобал хавфсизликнинг энг муҳим элементи деб билади.

"Лидер бўлиш осон эмас, айниқса қарашлар хилма-хил бўлганда. Лекин барча иштирокчилар умумий мудофаа учун умумий тушунча ва мажбуриятга эга", - дея таъкидлади Хегсетҳ.

Унинг қўшимча қилишича, ҳеч ким НАТО учун Доналд Трампдан кўпроқ иш қилмаган. АҚШ ҳар бир иттифоқчи давлат ўз ялпи ички маҳсулотининг камида 5 фоизини мудофаага сарфлашини кутмоқда.

"Бу биз дуч келаётган ҳақиқий таҳдидларни тан олиш белгисидир", деди вазир.

Хегсетнинг айтишича, Қўшма Штатлар иттифоқдаги ролидан ғурурланади, аммо бу юкнинг оғирлигини ёлғиз ўзи кўтариш ниятида эмас.

“Куч орқали жиловлаш ва тинчликка эришиш тўғри, аммо бунга фақат АҚШга таяниб эришиб бўлмайди”, — деди у.

Ўз навбатида, Марк Рютте Вашингтон бошиданоқ аниқ умидлар белгилаб қўйганини тасдиқлади. Унинг эслатишича, НАТО саммити 24-25 июн кунлари Гаагада бўлиб ўтади. У ерда мудофаа харажатларининг янги мақсади тасдиқланиши режалаштирилган.

"Мақсадларга эришиш учун биз сармояларни сезиларли даражада оширишимиз керак. Бу Европа, Канада ва АҚШ ўртасидаги ўйин майдонини тенглаштиришга ёрдам беради", деди Рютте.

Унинг қўшимча қилишича, саммитда НАТОнинг ҳарбий салоҳиятини, жумладан, ҳаво ҳужумидан мудофаа тизимлари, мобил кучлар, узоқ масофали ракеталар ва янги қўмондонлик имкониятларини ривожлантириш режаси келишиб олинади.