Рим папаси Лев XIV АҚШ президенти Дональд Трампнинг Европага нисбатан қилган охирги баёнотига муносабат билдириб, уни Вашингтон ва Европа ўртасидаги тарихий иттифоқни бузишга уринаётганликда айблади. Бу ҳақда Sky News хабар берди.
Трамп яқинда берган интервьюларидан бирида Европани «қулаётган қитъа» деб атаган ва унинг раҳбарларини «суст ва бетаъсир» дея танқид қилган эди. Папанинг таъкидига кўра, бундай баёнотлар икки томонлама кўп йиллик ҳамкорликка жиддий путур етказиши мумкин.
«Кечирасиз, аммо мен кузатаётган баъзи нарсалар Европага ва АҚШга ўнлаб йиллар давомида хизмат қилган ҳақиқий иттифоққа жиддий таъсир кўрсатмоқда. Яқиндаги интервьюларда Европага нисбатан айтилган сўзлар – бу муҳим ва келажак учун зарур бўлган альянсни бузишга уринишдек кўринади», – деди Папа Лев XIV Трамп берган интервьюга ишора қилиб.
Папа, шу билан бирга, Трамп ва унинг жамоаси ўз сиёсий дастурини ишлаб чиқиш ҳуқуқига эга эканини тан олди. Аммо унинг фикрича, бу дастурдаги айрим нуқталар ҳатто АҚШнинг ўзида ҳам кенг қўллаб-қувватланмайди.
Эслатиб ўтамиз, аввалроқ Трамп Украина атрофидаги можарони ҳал этишга Европанинг «ягона ҳиссаси – баёнотлар ва даъватлар» эканини айтиб, қитъани етакчилик қилмаётганликда айблаган эди. Axios нашрининг маълумотларига кўра, ҳатто АҚШ маъмуриятининг айрим вакиллари Европани Украина бўйича тинчлик келишувига асосий тўсиқ деб билади.
Келаётган ҳафта Ўзбекистонда совуқ ҳаво кутилмоқда
Муҳаммад Салоҳ жазоланадиган бўлди
АҚШ "ҳам сиз билан, ҳам биз билан ўйнаяпти" - Мерц
