Панамадаги 7,7 магнитудали зилзиладан сўнг 746 та афтершок қайд этилди

Панамада 9 октябрь куни содир бўлган 7,7 магнитудали зилзиладан кейин 746 та такрорий ер силкиниши қайд этилди. Бу ҳақда Панама университети Ер фанлари институти директори Нестор Луке мамлакатнинг La Prensa газетасига берган интервьюсида маълум қилди.

Луке сўнгги бир ҳафта давомида мамлакатда кузатилган сейсмик фаолликка алоҳида эътибор қаратди. Унинг сўзларига кўра, кучли зилзиладан кейин бир неча юзта такрорий ер силкиниши содир бўлган.

«Бундай магнитудали зилзиладан кейин афтершоклар бир ойдан икки ойгача давом этиши мумкин», — деди мутахассис.

Унинг тушунтиришича, зилзила натижасида ажралиб чиққан энергия тектоник блоклар ўртасидаги кучланишларнинг қайта тақсимланишига ва мувозанатнинг тикланиш жараёнига таъсир кўрсатишда давом этади.

9 октябрь куни Панаманинг жанубий чеккаси яқинидаги Питалоса-Арриба ҳудудида содир бўлган 7,7 магнитудали зилзила оқибатида 30 киши жароҳатланган, юзлаб аҳоли эса бошпанасиз қолган.