Озарбойжон илк бор Украинага газ етказиб берди

Бу ҳақда Украинанинг “Нафтогаз” энергетика компанияси бошқаруви раиси Сергей Корецкий маълум қилди.

"Синов етказиб берилиши Трансболқон йўлаги орқали амалга оширилди. Бу ҳажм жиҳатидан кичик бўлса-да, стратегик аҳамиятга эга қадам бўлиб, узоқ муддатли ҳамкорликка йўл очади", — Корецкий.

Қайд этиш жоиз, олдинроқ “Нафтогаз” Озарбойжоннинг SOCAR энергетика компанияси билан газ хариди бўйича илк шартномани имзолаганди.

Украина Энергетика вазири Светлана Гринчукнинг сўзларига кўра, Трансболқон газ қувури Украинага бутун дунёдан Грейия ва Туркиядаги терминалларга келаётган суюлтирилган газ ҳамда Озарбойжон газига йўл очади. У “Нафтогаз” ва SOCAR ўртасидаги битим олиб борилган саъй-ҳаракатлар ва музокаралар натижаси эканини таъкидлади.

Маълумот учун, Трансболқон йўлаги – бу Украина, Молдова, Руминия, Болгария ва Туркия ҳудуди орқали ўтувчи магистрал газ қувури ҳисобланади.