Озарбайжонда Эрондан Туркияга кетаётган юк машинасидан 77 кг “марихуана” топилди

Озарбайжон божхона ходимлари йирик халқаро гиёҳванд моддалар контрабандасининг олдини олишди

Эрон-Туркия йўналишида Нахичевон Автоном Республикаси орқали ҳаракатланаётган юк машинасида 77 килограммдан ортиқ гиёҳванд модда топилди.

Oxu.Az нашрининг Озарбайжон Республикаси Давлат божхона қўмитаси берган маълумотга асосланиб хабар беришича, Нахичевон бош божхона бошқармасига қарашли "Садарак" божхона пунктида Эрон Ислом Республикасидан Туркия Республикасига йўл олган, Туркия фуқароси бошқарувидаги юк автомобили синчиклаб кўздан кечирилди. Текширувда хизмат итидан ҳам фойдаланилган.

Юк сифатида олиб келинган девор панеллари орасида аниқланиши қийин усулларда яширилган, кумуш рангли фолга билан ўралган 24 дона ўрам топилди. Бу ўрамларда жами соф оғирлиги 77 килограмм 150 грамм бўлган гиёҳванд модда — марихуана борлиги аниқланган.