Оқ уй украиналикларни чиқариб юборишга тайёрми?

АҚШ президенти Доналд Трамп маъмурияти вақтинчалик ҳимояланган мақом остида мамлакатдаги мигрантларни оммавий “ихтиёрий депортация қилиш” режасини ишлаб чиқди. Бу ҳақда Оқ уйнинг ички ҳужжатларига таяниб, Washington Post нашри хабар бермоқда.

Нашр маълумотларига кўра, дастур билан 700 мингга яқин киши қамраб олинган. Улар орасида Россия билан урушдан қочган 200 минг украиналиклар ҳам бор. Рўйхатга Гаити, Афғонистон, Фаластин, Ливия, Судан, Сурия ва Яман фуқаролари ҳам киритилган.

Маъмурият режани амалга ошириш учун Мигрантлар ва қочқинларга ёрдам жамғармасидан 250 миллион доллар ажратишни таклиф қилди, бу эса собиқ дипломатлар ва инсон ҳуқуқлари ҳимоячиларининг танқидига сабаб бўлди. Улар маблағларни депортация қилиш учун ишлатиш жамғарма мақсадлари ва халқаро қонунларга зид эканини айтишди.

Washington Post манбаларининг таъкидлашича, ҳужжатлар 5 май куни АҚШ Ички хавфсизлик вазирлиги расмий баёнотидан олдин тайёрланган. Кейин ўз ватанларига қайтишга рози бўлган муҳожирларга бир марталик 1000 доллар тўлаш таклиф қилинган.

АҚШ Ички хавфсизлик вазирлиги матбуот котиби Трисиа Маклафлин ҳужжатларнинг ҳақиқийлигини тасдиқлади, аммо улар "эскирган"лигини айтди. ДҲС котиби Кристи Ноем ҳали украиналиклар ва гаитиликлар учун ТПСни тугатиш бўйича якуний қарор қабул қилмади, деди у.

Энди АҚШ Ички хавфсизлик вазирлиги ва АҚШ Давлат департаменти аллақачон қонуний мақомини йўқотганларга эътибор қаратмоқда. Нашр манбаларидан бири афғонлар депортация қилинадиган биринчи тоифа бўлиши мумкинлигини хабар қилган.

Украиналикларни вақтинчалик ҳимоя қилиш дастурлари 2022 йилда Байден маъмурияти томонидан Украинада уруш бошланганидан кейин жорий қилинган. Бироқ, Оқ уйга қайтганидан сўнг, Трамп кўпгина гуманитар дастурларни, жумладан, бошпана ва ТПСни қисқартириш тўғрисидаги фармонни имзолади.

19-феврал куни CBC News телеканали Қўшма Штатлар украиналиклар ва Лотин Америкаси давлатлари фуқароларининг иммиграция бўйича аризаларини қабул қилишни тўхтатиб қўйгани ҳақида хабар берди.

Айни пайтда, АҚШ Давлат департаменти ҳанузгача ўз фуқароларига хавфсизлик таҳдидлари сабабли Украинага ташриф буюришни тавсия этмайди. Халқаро ҳуқуқ қочқинларни ҳаёти ёки эркинлиги хавф остида бўлган мамлакатга мажбуран қайтаришни тақиқлайди. БМТ билан ҳамкорлик қилувчи Халқаро Миграция Ташкилоти (ХМТ) ҳам режани танқид қилди.