Оқ уй Украинага 2025 йил охирига қадар президентлик сайловларини ўтказишни таклиф қилмоқчи

АҚШ президентининг Украина ва Россия бўйича махсус вакили Кит Келлог Киев парламент ва президентлик сайловларини ўтказиши кераклигини маълум қилди, деб ёзмоқда Reuters.

«Аксарият демократик давлатлар уруш вақтида сайловлар ўтказади. Ўйлайшимча, бу муҳим. Буни демократирия учун фойдали деб ўйлайман. Мустаҳкам демократиянинг жозибаси — сайловларда қатнаша оладиган бир нечта номзодлар борлигида», — дейди Келлог.

Келлог ва Оқ уйнинг бошқа вакиллари охирги кунларда Украинани Россия билан дастлабки сулҳ вақтида сайловлар ўтказишга ундаш кераклигини муҳокама қилмоқда. Агар сайловлар ўтказилса, агентлик суҳбадошларининг айтишича, ғолиб узоқ муддатли тинчлик битими бўйича музокараларга масъул бўла олади.

Шу билан бирга, Трамп маъмурияти сулҳ бўйича дастлабки келишувга эришиш ва шундан кейингина узоқ муддатли тинчлик шартномаси устида ишлаш ҳақида ҳали якуний қарорга келмаган.

Агентлик суҳбадошларининг қўшимча қилишича, Оқ уй ҳозирча Украина ҳукуматига йил охирига қадар сайловлар ўтказиш таклифини расман бермаган. Шу боис Киевнинг бундай таклифга муносабатини олдиндан прогноз қилиш мушкул. Украина президенти Володимир Зеленский бир неча бор уруш вақтида сайловлар ўтказилмаслиги ҳақида гапирган эди.

Владимир Зеленскийнинг беш йиллик президентлик ваколати 2024 йил майда якунига етган — шундан бери Россия пропагандаси ва ҳукумати унинг «нолегитимлиги» тўғрисидаги тезисларни илгари суриб келади. Украинанинг ўзида бу борада консенсус мавжуд, уруш давом этаркан, Зеленский давлат раҳбарилигича қолади.

Зеленский 2022 йил октябрда Путин билан музокаралар ўтказишни тақиқловчи фармонни имзолаган эди. 2025 йил 26 январ куни Зеленский унинг фармони ўзидан бошқа ҳамма учун музокараларни тақиқлашни назарда тутганини маълум қилди. «Мен Украина президентиман, мен у ёки бу музокаралар етакчисиман ва мен бошқаларга тақиқлаганман», — деди у.