Оқ уй Ғазода ўт очишни тўхтатиш декларацияси матнини эълон қилди

Қўшма Штатлар, Туркия, Қатар ва Миср Ғазо секторидаги тинчлик келишувини олқишлаб, уни сақлаб қолиш учун биргаликда ишлашга ваъда берди.

Бу ҳақда Оқ уй сайтида эълон қилинган юқорида тилга олинган мамлакатлар қўшма декларацияси матнида айтилган.

"Биз Ғазо секторида кенг қамровли ва узоқ муддатли тинчлик келишуви йўлида эришилган ютуқларни, шунингдек, Исроилнинг минтақадаги қўшнилари билан дўстона ва ўзаро манфаатли муносабатларини олқишлаймиз. Биз бу меросни амалга ошириш ва асраб-авайлаш, келажак авлодлар тинчликда гуллаб-яшнаши мумкин бўлган институционал асосларни барпо этиш учун биргаликда ишлаш мажбуриятини оламиз", дейилади ҳужжатда.

Декларацияда, шунингдек, Яқин Шарқ “ирқи, дини ва этник келиб чиқишидан қатъи назар, тинчлик, хавфсизлик ва иқтисодий фаровонлик муҳитида ўз интилишларини амалга ошириши мумкин бўлган” жой бўлиши учун минтақадаги барча учун бағрикенглик ва тенг имкониятларга содиқлик таъкидланади.

“Биз минтақада тинчлик, хавфсизлик ва умумий фаровонликни таъминлаш, ўзаро ҳурмат ва умумий тақдир тамойилларига асосланган кенг қамровли қарашларга эгамиз”, — дейилади ҳужжатда.

Томонлар, шунингдек, Яқин Шарқдаги келажакдаги келишмовчиликларни дипломатик йўллар билан ҳал этиш муҳимлигини таъкидладилар.

"Биз келажакдаги низоларни куч ишлатиш ёки чўзилган можаролар йўли билан эмас, балки дипломатик иштирок ва музокаралар йўли билан ҳал қилиш тарафдоримиз. Биз тан оламизки, Яқин Шарқ узоқ давом этган урушлар, тўхтаб қолган музокаралар ёки эришилган келишувларнинг қисман, тўлиқсиз ёки танлаб амалга оширилишининг чексиз циклини давом эттира олмайди", дейилади декларацияда.

13 октябрь куни Шарм ал-Шайхда Ғазо секторида ўт очишни тўхтатиш ва у ерда гаровга олинган барча исроилликларни озод қилиш учун чақирилган тинчлик саммити бўлиб ўтди. Учрашувда Миср президенти Абдулфаттоҳ ас-Сиси, Қатар амири Шайх Тамим бин Ҳамад Ал Тани, АҚШ президенти Дональд Трамп ва Туркия етакчиси Ражаб Тоййиб Эрдўғон Фаластин анклавида ўт очишни тўхтатиш бўйича якуний келишувни имзолади.