«Олтин тўп» соҳиби Дембеле Transfermarkt версияси бўйича дунёдаги энг қиммат 20 футболчи қаторига кирди

Франция терма жамоаси ва «ПСЖ» ҳужумчиси Усман Дембеленинг баҳоланган нархи Transfermarkt сайтининг янгиланиши натижасида 10 миллион еврога ошди. Ҳозирги пайтда 2025 йилги «Олтин тўп» совриндори 100 миллион еврога баҳоланмоқда.

Янгиланишдан сўнг, 28 ёшли ҳужумчи Transfermarkt талқини бўйича дунёдаги энг қиммат 20 футболчи рўйхатига кирди. Рўйхатнинг биринчи поғонасини Испания терма жамоаси ва «Барселона» вингери Ламин Ямал (200 миллион евро) эгаллади. У жорий йилдаги «Олтин тўп» сўровида иккинчи ўринни олган эди.

Ўтган мавсумда Дембеле барча мусобақаларда жами 53 та ўйинда майдонга тушиб, 35 та гол урди ва 16 та голли узатма амалга оширди. У «ПСЖ» таркибида Чемпионлар Лигаси, Лига 1, Франция Кубоги ва Суперкубогини қўлга киритди.