"Олтин" мамлакатлар эълон қилинди: Ўзбекистон, Хитой ва Қозоғистон етакчи

Дунёнинг турли мамлакатлари марказий банклари уч йил кетма-кет захираларини тўлдириш учун 1000 тоннадан ортиқ олтин сотиб олмоқда. Ривожланаётган мамлакатлар Марказий банклари қимматбаҳо металлни соф сотиб олиш бўйича етакчилик қилмоқда, деб ёзади "РБК" Жаҳон олтин кенгаши (World Gold Council, WGC) маълумотларига асосланиб.

Ривожланаётган мамлакатлар Марказий банклари соф олтин сотиб олишда пешқадамлик қилмоқда, бунда Ўзбекистон, Хитой ва Қозоғистон энг йирик харидорлар учлигига киради. Шунингдек, Полша ва Ҳиндистон ҳам олтин захираларини кўпайтирмоқда - иккала марказий банк 2025 йил январь ойида ўз захираларига 3 тоннадан қўшди.

УБС экспертлари 2025 йилда жаҳон марказий банкларининг олтинга бўлган қизиқиши сақланиб қолишини ва уларнинг харидлари ҳажми 900 тоннага етиши мумкинлигини тахмин қилмоқда.

Энг катта олтин захираларига эга давлатлар рўйхатида биринчи ўринни АҚШ эгаллаган, унинг олтин захиралари 8133,46 тоннани ташкил этади. Иккинчи ўринда Германия (3351,53 тонна) туради. Кейинги ўринларда тахминан бир хил олтин захирасига эга бўлган тўртта мамлакат туради. Булар Италия (2451,84), Франция (2437), Россия (2335,9) ва Хитой (2279,56) ҳисобланади. Энг юқори ўнталикка Швейцария, Ҳиндистон, Япония ва Нидерландия ҳам киритилган.