Одил Ҳамробеков: «Бош мураббий ҳақида расман тасдиқлангандан кейин гапирсак, тўғри бўлади»

Ўзбекистон миллий жамоаси футболчиси Одил Ҳамробеков «CAFA Nations Cup» мусобақаси олдидан ўз фикрларини билдириб ўтди.

«Эрондаги фаолиятим яхши бошланди. Бу ҳамма футболчи учун қувонарли. У ердан келиб, миллий жамоа машғулотларига қўшилдим. Бугундан мусобақага тайёргарлик кўришни бошлаймиз.

Терма жамоалар маркази»даги шароитлар зўр. Футболчилар учун барча қулайликлар мавжуд. Мусобақага тайёргарлик кўриш учун етарлича шароит яратиб берилган.

Миллий жамоаларда кўп вақт бўлмаслигимиз сабаб бу ерда ҳар қандай ўйин ёки турнир даражасидан қатъий назар юқори аҳамиятга эга бўлади. Бу нафақат футболчилар учун, балки мураббийлар учун муҳим деб ўйлайман.

Олдимизга қўйилган жаҳон чемпионатига чиқиш вазифасини уддаладик. Энди мундиалда муносиб иштирок этиш учун жадал тайёргарлик кўришимиз лозим.

Дастлабки ўйинларда етакчи легионер футболчиларнинг йўқлиги қанчалик таъсир қилишини вақт кўрсатади. Лекин бу жараёнда уларнинг ўрнида ўйнайдиган футболчилар ўзини кўрсатиш учун яхшигина имкониятга эга бўлади.

Ўмон — яхши шаклланган жамоа. Натижалари, совринлари билан мақтана олмаса ҳам рақибларига жиддий қаршилик кўрсата олиши билан ном қозонган.

Ҳозир улар Карлуш Кейруш қўл остида янада жиддий жамоага айланиб бормоқда. Менимча, эртага яхши савиядаги ўйин гувоҳи бўламиз.

Миллий жамоа бош мураббийлиги ҳақида расман тасдиқлангандан кейин гапирсак, тўғри бўлади. Ҳозирги кунда Темур Тоҳирович (Кападзе) бош мураббийимиз ҳисобланади. Айнан унинг кўрсатмалари билан турнирга тайёргарлик кўряпмиз», — деди Ҳамробеков.