ОАВ: АҚШда Гренландия масаласида ёпиқ учрашув ўтказилади

АҚШ вице-президенти Ж.Д. Вэнс Дания ташқи ишлар вазири Ларс Локке Расмуссен ва Гренландия мустақиллик ва ташқи ишлар вазири Вивиане Мотзфелдт билан ёпиқ эшиклар ортида музокаралар ўтказади, деб хабар берди The Washington Post манбаларга асосланиб.

Газета манбаларига кўра, Дания ва Гренландия дипломатлари дастлаб Вэнс билан эмас, балки АҚШ Давлат котиби Марко Рубио билан учрашувни сўрашган. Музокаралар дастлаб Давлат департаменти учун режалаштирилган эди, аммо Вэнс иштирок этиш истагини билдирганидан кейин жой Оқ уйга ўзгартирилди, дейишди манбалар.

Марко Рубио, Ж.Д. Вэнс, Ларс Локке Расмуссен ва Вивиане Мотзфелдт ёпиқ эшиклар ортидаги музокараларда иштирок этишади, деб хабар беришди расмийлар газетага анонимлик шарти билан.

Bloomberg хабарига кўра, Дания ва Гренландия вакиллари учрашувда АҚШ президенти Доналд Трампнинг оролга оид «асл ниятлари» ҳақида билишни исташади. Агентлик хабар беришича, музокаралар давомида Дания ва Гренландия томонлари Қўшма Штатларни оролни аннекция қилмасликка кўндиришга ҳаракат қилишади.

Доналд Трамп Америка миллий хавфсизлигини таъминлаш учун Гренландиянинг Қўшма Штатларга қўшилиши зарурлигини бир неча бор таъкидлаган. 13 январь куни Конгрессда оролга давлатчилик ҳуқуқини бериш тўғрисидаги қонун лойиҳаси тақдим этилди. Гренландия ҳукумати ҳудудни аннекция қилиш ғоясини рад этди. Бугун Америка президенти НАТОни Қўшма Штатларга Гренландияни олишга ёрдам беришга чақирди. Politico нашрининг хабар беришича, Трамп оролни референдум орқали аннеция қилмоқчи.