Нью-Йоркда "легионерлар касаллиги" тарқалди: 1 киши ҳалок бўлди, 20 дан ортиғи зарарланди

АҚШнинг Нью-Йорк шаҳрида "легионерлар касаллиги" (легионеллёз) тарқалиши оқибатида 1 киши вафот этди, камида 22 киши ушбу бактерия билан зарарланган. Бу ҳақда ABC телеканали шаҳар Соғлиқни сақлаш департаментига таяниб хабар берди.

Маълумотларга кўра, касаллик Гарлем ва унга яқин жойлашган туманларда қайд этилган.

«Текширув доирасидаги барча градирнялар (совитиш қурилмалари) текширилди. Илк натижаларда муаммо аниқланган биноларнинг эгаларига **24 соат ичида чора кўриш буйруғи берилди», — дейилади соғлиқни сақлаш департаменти баёнотида.

Касаллик кимлар учун хавфли?

Легионеллёз, асосан, 50 ёшдан ошган шахслар, тамаки чекувчилар, ўпка касалликлари ёки иммунитети паст инсонлар учун хавфли ҳисобланади.

Бу касалликни легионелла бактерияси келтириб чиқаради. У иссиқ сув муҳитида тез кўпаяди, айниқса ҳаво совитиш тизимларида.

Ҳозирда Нью-Йорк расмийлари эпидемиянинг олдини олиш ва хавфли манбаларни бартараф этиш ишларини давом эттирмоқда.