Норвегия ҳукумати россиялик ва беларуслик профессионал спортчилар ҳамда уларга ҳамроҳлик қилувчи ходимларнинг мусобақаларда қатнашиш учун мамлакатга киришига рухсат бермасликка қарор қилди. Бу ҳақда Норвегия ҳукуматининг расмий сайтида хабар берилди.
Баёнотга кўра, Адлия ва жамоат хавфсизлиги вазирлиги Иммиграция бошқармаси ҳамда полицияга мусобақаларда қатнашиш учун Норвегияга келадиган россиялик ва беларуслик профессионал спортчилар, шунингдек, уларга ҳамроҳлик қилувчи шахсларнинг мамлакатга киришини рад этиш бўйича кўрсатма беради. Янги тартиб яқин вақт ичида кучга киради.
Норвегия ҳукумати Россия спорти мамлакат ҳокимияти ва давлат тузилмалари билан чамбарчас боғлиқлигини таъкидлади. Шу сабабли, ҳукумат фикрича, Россиянинг халқаро мусобақалардаги иштирокини Украинадаги давом этаётган урушдан алоҳида кўриб чиқиб бўлмайди.
Норвегиянинг бу қарори Финляндия россиялик спортчиларнинг мамлакатга киришига чеклов жорий этишини эълон қилганидан бир кун ўтиб қабул қилинди. Финляндия бу ҳақда 12 ноябрь куни маълум қилган эди. Халқаро конкида учиш иттифоқи (ISU) эса Финляндиянинг қарорини қўллаб-қувватламади. Ташкилот спортчилар ўз ҳукуматларининг ҳаракатлари учун жавобгар бўлмаслиги кераклигини билдирди.
Ўзбекистон - Россия учрашувининг энг зўр ўйинчисига бир кило помидор берилди
Чақалоғини ҳожатхонага ташлаган аёлга 3 йиллик жазо тайинланди
АҚШ ва Эрон дастлабки келишувга эришиш сари илгариламоқда
