Нега АҚШ Фаластинни тан олмайди?

Трамп Британияни Фаластин мустақиллигини тан олиш қарори учун танқид қилди.

АҚШ президенти Дональд Трамп Буюк Британия бош вазири Кир Стармернинг Фаластинни мустақил давлат сифатида тан олиш режаларига кескин қарши чиқди. Оқ уй раҳбари Исроилга тўлиқ қўллаб-қувватлаш ваъда қилди.

Air Force One бортида Трамп шундай деди:

«Агар сиз Фаластинни тан олсангиз, демак ХАМАСни рағбатлантираяпсиз. Биз бундай қилмаймиз».

Бу сўзлар Исроил бош вазири Биньямин Нетаньяхунинг сўзларини айнан такрорлайди. У ҳам Фаластинни тан олиш ХАМАС позицияларини «мустаҳкамлайди» деган фикрда. Бироқ Франция, Британия ва яна 14 та давлат бу фикрга қўшилмайди. Улар сентябрь ойида БМТ Бош Ассамблеясида Фаластинни тан олиш ниятида. Британия ТИВ таъкидлашича, тан олиш тинчлик ва икки давлатли ечим учун калит бўлади.

Ҳафта бошида Трамп Шотландияда Стармер билан учрашди. Ўшанда у Лондоннинг тан олиш режасини танқид қилмади. Аксинча, «Агар у шундай позицияни эгаллаган бўлса, мен қарши эмасман», деди.

Бу сукут Макроннинг баёнотига нисбатан Трампнинг кескин реакцияси билан кескин фарқ қилади. Франция президенти биринчи бўлиб Фаластинни тан олишини айтганди. Шунда Трамп:

«Бу сўзлар ҳеч нарса англатмайди», — деб жавоб берган.

Бу ҳафта Трамп кутилмаганда Исроил Бош вазири Нетаньяхуни ҳам танқид қилди. Журналистлар «Газада болалар ач қолаётгани ростми?» деб сўрашганда, Трамп шундай жавоб берди:

«Телевизорда болалар оч қолгани кўринади. Бундай нарсани сохталаштириб бўлмайди».

Шу билан бирга, АҚШнинг Исроилдаги элчиси Майк Хакаби таъкидлашича, «Трамп ва Нетаньяху ўртасидаги алоқа ҳар қачонгидан ҳам кучли».

Бироқ сўнгги сўровлар бошқачароқ манзарани кўрсатмоқда. The Guardian таъкидлашича, Трампнинг кўплаб тарафдорлари орасида Исроилга бўлган қўллаб-қувватлаш пасайиб бормоқда. Gallup маълумотларига кўра, АҚШ аҳолиси орасида Газодаги ҳарбий ҳаракатларни қўллаб-қувватлаш даражаси 32% гача тушиб кетган.

Ёшлар ва баъзи MAGA ҳаракати тарафдорлари орасида Исроилга нисбатан танқид кучаймоқда. Масалан, Трампнинг собиқ маслаҳатчиси Стив Бэннон Газодаги вазият республикачиларнинг Исроилга ишончини сусайтирмоқда, деб таъкидлади. Конгресс аъзоси Марджори Тейлор Грин эса Исроил ҳаракатларини очиқча «геноцид» деб атади.