"Нефтчи" ва "Пахтакор" бугун Элит ОЧЛдаги навбатдаги ўйинларини ўтказади

Бугун, 26 октябрь куни ОФК Элит Чемпионлар лигасининг 2026/27 йилги мавсумида 3-тур учрашувларига старт берилади. Дастлабки ўйин кунида Ғарб минтақасида бешта баҳс ўтказилади.

Ўзбекистоннинг икки вакили — "Нефтчи" ва "Пахтакор" ҳам бугун майдонга тушади.

Фарғонанинг "Нефтчи" клуби ўз майдонида Саудия Арабистонининг "Ал-Иттиҳод" жамоасини қабул қилади. Мазкур учрашув Тошкент вақти билан соат 18:45 да бошланади.

Тошкентнинг "Пахтакор" жамоаси эса Ироқда "Ал-Қува Ал-Жавия" клубига қарши баҳс олиб боради. Учрашув 26 октябрдан 27 октябрга ўтар кечаси соат 23:15 да старт олади.

Шунингдек, кун давомида "Ал-Айн" – "Трактор", "Ал-Аҳли" – "Ал-Ғарафа" ҳамда "Ал-Қодисия" – "Ал-Садд" учрашувлари ўтказилиши режалаштирилган.

Элит ОЧЛ. 3-тур

26 октябрь, душанба

18:45. "Нефтчи" – "Ал-Иттиҳод"

21:00. "Ал-Айн" – "Трактор"

21:00. "Ал-Аҳли" – "Ал-Ғарафа"

23:15. "Ал-Қува Ал-Жавия" – "Пахтакор"

23:15. "Ал-Қодисия" – "Ас-Садд"

Барча вақтлар Тошкент вақти билан кўрсатилган.

Эслатиб ўтамиз, дастлаб 26 октябрга белгиланган "Ан-Насср" – "Ал-Васл" учрашуви ОФК қарори билан номаълум муддатга қолдирилган. Баҳснинг янги санаси кейинроқ эълон қилинади.