Наркоз остида зўрланган болалар: жарроҳ 20 йилга қамалди

Франция суди юзлаб вояга етмаган беморларни жинсий зўрлашда айбдор деб топилган собиқ жарроҳ, 74 ёшли Жоэл Ле Скуарнекни 20 йил озодликдан маҳрум қилишга ҳукм этди, деб хабар бермоқда France24.

Скуарнек аллақачон 2020 йилда чиқарилган ҳукм бўйича жазо муддатини ўтамоқда: ўшанда унга тўрт нафар болани, жумладан, икки жиянини зўрлагани учун 15 йил қамоқ жазоси берилганди.

Шифокорнинг иккинчи иши материалларига кўра, у 299 нафар беморга нисбатан зўрлаш ва бошқа жинсий зўравонлик ҳаракатларини содир этган, уларнинг 256 нафари 15 ёшдан кичик болалар бўлган. Скуарнек бу жиноятларни 1989 йилдан 2014 йилгача Франция шифохоналарида ишлаган пайтида содир этган. Айблов баёнотига кўра, унинг тахминий қурбонларининг аксарияти наркоз таъсирида бўлганлиги сабабли содир бўлган воқеа ҳақида ҳеч нарса эслай олмаган.

Полиция улар билан боғланиб, уларнинг исмлари - зўравонликнинг батафсил тасвирлари билан бирга - Ле Скуарнекнинг кундалигида қайд этилганини хабар қилганда, улар даҳшатга тушишди. Айбловга кўра, Ле Скуарнекнинг оила аъзолари унинг бу қилмишларидан хабардор бўлишган, аммо унга тўсқинлик қила олишмаган. "Айнан оиладаги омерта (бир-бирини ҳимоя қилиш) туфайли унинг зўравонлиги ўн йиллар давомида давом этган," - деб BBC’га ишда қатнашган адвокатлардан бири айтди.

Скуарнек содир этган зўравонликларни тасвирлаб, қурбонларининг исмлари ва ёшини кўрсатиб, кундалик юритган. Шифокор ўзини бузғунчи ва педофил деб таърифлаб, бундан жуда мамнун эканлигини ёзган.

France24 хабар беришича, прокурор Скуарнекка нисбатан 20 йиллик озодликдан маҳрум қилиш жазосини талаб қилган - бу унга қўйилган айбловлар бўйича мумкин бўлган энг узоқ муддат. Собиқ шифокор ўз айбини тўлиқ тан олган.