Мумбай аеропортида қўл сумкасида 40 га яқин заҳарли илонлар билан Таиланддан учиб келган йўловчи қўлга олинди

Таиланддан учиб келган ва чамадонида қарийб қирқта заҳарли илон ҳамда тошбақаларни ноқонуний олиб ўтаётган йўловчи Мумбай (Ҳиндистон) шаҳрига қўнгандан сўнг қўлга олинди. Бу ҳақда якшанба куни кечқурун Ҳиндистон божхона хизмати хабар берди.

Божхона баёнотига кўра, эркак Таиланддан учиб келган рейсда қўл юки ичида, жумладан, қарийб 40 та индонезиялик илон (гадюкалар)ни яширинча олиб киришга уринган.

Йўловчининг шахси ошкор этилмади, бироқ у билан бирга учта ўргимчаксимон гадюка ва бешта Осиё тошбақаси ҳам аниқланган.

Бомбай божхонаси томонидан мусодара қилинган ҳайвонларнинг суратлари эълон қилинди. Суратларда кўк ва сариқ рангдаги судралувчилар челак ичида типирчилаб тургани тасвирланган. Бу ҳақда Noi.md нашри adevarul.ro манбасига таяниб хабар берган.

Эслатиб ўтамиз, февраль ойида ҳам божхоначилар яна бир йўловчини тўхтатишган эди. Унинг юк сумкасида пластик қутига "ижодкорона тарзда" яширилган бешта сиаманг гиббони (Индонезия, Малайзия ва Таиланд ўрмонларида яшовчи митти маймунлар) борлиги аниқланган. Бу жонзотлар Халқаро табиатни муҳофаза қилиш иттифоқи (IUCN) томонидан йўқолиб кетиш хавфи остидаги турлар қаторига киритилган.