Муҳаммад Салоҳ қачон "Ливерпуль"дан кетишини аниқлаб олди

Ҳужумчи Муҳаммад Салоҳ "Ливерпуль"ни тарк этишга қарор қилди. Football Transfers хабарига кўра, 33 ёшли мисрлик 2026 йилнинг ёзида мерсисайдликлар сафини тарк этишни режалаштирмоқда. Катта эҳтимол билан Салоҳ бир йилдан кейин фаолиятини Саудия Арабистонида давом эттиради. Бу трансфердан "Ливерпуль" яхшигина пул ишлаб олиши мумкин.

Салоҳ 2024/2025 йилги мавсумни жуда ёрқин ўтказди. Барча мусобақаларда 52 та расмий ўйинда мисрлик футболчи 34 та гол ва 23 та голли узатмани ўз ҳисобига ёздириб қўйди. Муваффақиятли ўйинлар Муҳаммадга "Ливерпуль" билан шартномасини 2027 йилнинг ярмигача узайтириш имконини берди. Нуфузли "Transfermarkt" портали Салоҳни 50 миллион еврога баҳоламоқда.