Москва АҚШга ишонмайди: Яхшиликка умид, ёмонликка тайёргарлик

Москва АҚШ билан муносабатларда "ортиқча оптимизм"дан огоҳлантиряпти.

Кремль матбуот котиби Дмитрий Песков, Россия "яхшиликка умид қилиши, аммо ёмонликка тайёр туриши" кераклигини таъкидлаб, Вашингтоннинг Киевдан узоқлашишга бўлган уринишларига эҳтиёткорлик билан ёндашишга чақирди.

"Воқеликка ортиқча оптимизм билан қараманг," деди Кремль расмийси Москвадаги Олий иқтисодиёт мактаби тингловчиларига, Россия ўз манфаатларини ҳимоя қилиш учун "доимо шай туриши зарур"лигини таъкидлаб.

Трамп маъмурияти Киевга ҳарбий ёрдам ва разведка маълумотларини алмашишни тўхтатган бўлса-да, Песков Украинанинг кўп ойлар давомида жанг қилиш учун етарли қурол-яроққа эга эканлигини айтди. Илон Маскнинг Украина қўшинлари учун Starlink интернет хизматини тўхтатиши эҳтимоли ҳақида фикр билдирар экан, Песков бунинг ўрнини қоплаш учун "бошқа бир нарса" ишга туширилишини айтди.