Европа Чемпионлар лигаси ярим финали дастлабки баҳсида «Барселона» ўз майдонида «Интер»ни қабул қилди, ўйинда 3:3 ҳисобидаги жанговар дуранг қайд этилди.
Учрашувнинг илк дақиқасидаёқ Тюрамнинг голи эвазига ҳисобни очган Индзаги шогирдлари 21-дақиқага келиб Дюмфриснинг голи эвазига фарқни иккитага етказди. Аммо орадан 3 дақиқа ўтиб Ламин Ямал суперголи билан ҳисобни қисқартирди. 38-дақиқада Педрининг шедевр узатмасини Рафиня қабул қилиб олиб, Ферран Торресни жуда қулай вазиятга чиқариб берди, «акула» эса ҳисобдаги мувозанатни тиклади.
Учрашувнинг 64-дақиқасида Дюмфрис бурчак тўпидан бош билан гол киритиб яна меҳмонларни ҳисобда олдинга олиб чиқди. Орадан бир дақиқа ўтиб «Барселона» ҳам бурчак зарбасини ижро этди, тўпни қабул қилган Рафинянинг олисдан йўллаган ажойиб зарбасидан сўнг тўп дарвоза тўсинига тегиб қайтди ва Зоммерга тегиб яна дарвоза тўридан жой олди — 3:3.
Ушбу баҳсда иккала жамоада ҳам йўқотишлар бўлди. Дастлаб мезбонлар сафида Кунде биринчи таймда жароҳат олиб ўринини Эрик Гарсияга бўшатиб берган бўлса, миланликлар сафида жамоа сардори Лаутаро Мартинес жароҳат олиб майдонни эрта тарк этди.
Жавоб учрашуви 6 май куни Миландаги «Жузеппе Меацца» стадионида бўлиб ўтади.
БАА бош мураббийи мухлисларга мурожаат билан чиқди
БАА - Ўзбекистон ўйинини қайси телеканаллар орқали томоша қилиш мумкин?
Футболчиларимизни қандай қимматбаҳо совғалар кутаётгани маълум бўлди
