Мессининг "Интер Майами"даги режалари маълум бўлди

Аргентиналик ҳужумчи Лионель Месси "Интер Майами" билан шартномасини 2028 йил охиригача узайтиради.

Бу ҳақда журналист Хави Кампос Tot Costa подкастида маълум қилди.

Манбага кўра, янги келишув яқин ҳафталарда эълон қилинади. Қайд этилишича, аргентиналик футболчи 2026 йилги жаҳон чемпионати ва 2028 йилги Америка кубогида иштирок этиш ниятида.

Месси 38 ёшда, у 2023 йилнинг ёзидан буён "Интер Майами"да ўйнамоқда. Ўтган мавсумда футболчи МЛС мунтазам чемпионати ғолибига айланди ва турнирнинг энг яхши футболчиси сифатида эътироф этилди. Унинг клуб билан шартномаси 2025 йилнинг охиригача амал қилади.

Месси фаолияти давомида Испаниянинг “Барселона” ва Франциянинг “Пари Сен-Жермен” клубларида ўйнаган. Аргентиналик футболчи саккизта “Олтин тўп” соҳиби ҳисобланади. Аргентина терма жамоаси билан Месси Жаҳон чемпионати (2022) ва Америка Кубоги (2021, 2024) ғолибига айланди.