Мерц Украинага молиявий ёрдам ажратиш бўйича келишув бўлмаса, ЕИ бюджетини блоклаш билан таҳдид қилди

Германия канцлери Фридрих Мерц Европа Иттифоқининг 2028–2034 йилларга мўлжалланган узоқ муддатли бюджетини блоклаш билан таҳдид қилди. Унинг таъкидлашича, агар иттифоққа аъзо барча давлатлар Украинани кейинчалик ҳам молиялаштириш бўйича мажбурият олмаса, бюджетни тасдиқлаш масаласи қийинлашади. Бу ҳақда Financial Times нашри Мерцнинг Европа Кенгаши раиси Антониу Коштага йўллаган мактубига таяниб хабар берди.

«Молиялаштиришдаги етишмовчиликни қоплаш учун барча давлатларнинг истисносиз равишда адолатли ҳисса қўшиш мажбуриятини олиши ушбу муаммони ҳал қилишнинг зарур шартидир», — дейилади мактубда.

Мерц, шунингдек, 2028 йилдан бошлаб Украинани бир неча йил давомида барқарор молиявий қўллаб-қувватлаш тизимини яратишни талаб қилган. Ушбу масала Дублинда бўлиб ўтадиган ЕИ етакчилари саммитида муҳокама қилиниши режалаштирилган.

Киев баҳолашига кўра, 2027 йилда Украинага ташқи молиялаштириш учун тахминан 70 миллиард евро керак бўлади. Европа Иттифоқи ушбу маблағнинг қарийб 45 миллиард еврога тенг қисмини ажратишни режалаштирмоқда. Бироқ Венгрия, Словакия, Болгария ва Чехия Украинани кейинчалик ҳам молиялаштиришда иштирок этишга қарши чиқмоқда.

Айни пайтда ЕИ давлатлари 2028–2034 йилларга мўлжалланган умумий бюджет бўйича ҳам келишмовчиликларга дуч келмоқда. Ирландия раислиги бюджетни 159 миллиард еврога қисқартириб, 1,826 триллион еврога туширишни таклиф қилган.

Мерц эса таклиф этилаётган қисқартиришларни етарли деб ҳисобламайди. Шу билан бирга, у мудофаа, илмий тадқиқотлар ва Европа иқтисодиётининг рақобатбардошлигини оширишга йўналтирилган харажатларни камайтиришга қарши.