Мелиқўзиев WBA’дан чемпионлик жанги талаб қилди: "Бу менинг имкониятим"

Ўзбекистонлик профессионал боксчи Бектемир Мелиқўзиев The Ring нашрига берган интервьюсида WBA йўналиши супер ўрта вазн тоифаси чемпиони Хайме Мунгуя билан жанг масаласи юзасидан норозилигини билдирди. У мексикалик боксчини ўзи билан тўқнашувдан қочаётганликда айблади.

"Бек Bully" лақаби билан танилган Мелиқўзиевнинг профессионал рекорди 17 та ғалаба ва 1 та мағлубиятдан иборат бўлиб, 11 та жангни нокаут билан якунлаган. Айни пайтда у WBA чемпионлик камари учун мажбурий даъвогар мақомида.

Бироқ ўзбекистонлик боксчи ҳанузгача Мунгуяга қарши чемпионлик жанги ўтказиш имкониятига эга бўлмаган. Хайме Мунгуя 2026 йил май ойида Армандо Ресендисни ҳакамларнинг якдил қарори билан мағлуб этиб, WBA супер ўрта вазн тоифасидаги чемпионлик камарини қўлга киритган.

Мелиқўзиевнинг таъкидлашича, у мажбурий даъвогар мақомини рейтинг ёки келишувлар орқали эмас, балки рингдаги натижалари билан қўлга киритган.

"WBA нега ўз қоидаларига амал қилмаётганини тушунмаяпман. Расмий мажбурий даъвогар бор ва чемпион камарини айнан шу боксчига қарши ҳимоя қилиши керак", — деди Мелиқўзиев.

Ўзбекистонлик боксчи Мунгуяга аввал бошқа рақиб билан жанг қилиш имконияти берилишига қарши эмаслигини, аммо шундан кейин чемпионлик жанги учун навбат айнан унга келиши лозимлигини таъкидлади.

"Биз ҳар доим қоидаларга амал қиламиз. Рейтингда ҳам шу қоидалар асосида юқорилаб борамиз. Аммо ниҳоят ўзимиз меҳнат қилиб топган имкониятни олиш вақти келганда, қоидаларга риоя қилинмаяпти", — деди у.

Мелиқўзиев бу ҳуқуқни рингдаги ғалабалари орқали қўлга киритганини яна бир бор урғулади.

"Мен бу позицияни рингда қўлга киритдим. Бу жанг менга кафолатланган эди. WBA ҳам, Golden Boy ҳам менга ушбу имконият берилишини айтган", — деди боксчи.

Бектемирнинг фикрича, унинг Мунгуя билан эҳтимолий жанги супер ўрта вазн тоифасидаги энг томошабоп тўқнашувлардан бири бўлиши мумкин.

"У жанг қилишни яхши кўради, мен ҳам жанг қилишни яхши кўраман. Бу ҳақиқий уруш бўлади", — дея таъкидлади Мелиқўзиев.

Ўзбекистонлик боксчи мазкур тўқнашувни 31 октябрь куни Саудия Арабистонида Канело Альварес ва Кристиан Мбилли жанги ўтказиладиган бокс оқшоми доирасида ташкил этиш таклифини ҳам илгари сурган.

Мелиқўзиев Мунгуяни мағлуб этиш имкониятига ишонишини ҳам яширмади.

"У ажойиб боксчи. Доимо олдинга интилади ва рингга чиққанида ҳақиқий жанг қилади. Аммо мен ҳам худди шундайман. Уни мағлуб этиш учун менда барча имкониятлар борлигига ишонаман", — деди у.

Бектемирнинг сўнгги жанги февраль ойида бўлиб ўтган. Ўша баҳсда у Сена Агбекони еттинчи раундда нокаутга учратган.

Ҳозир Мелиқўзиев мажбурий даъвогар сифатида чемпионлик жанги навбатини кутмоқда. Унинг фикрича, бошқа жангда иштирок этиб, чемпионлик имкониятини хавф остига қўйиш мантиқсиз.

"Мен бошқа барча боксчиларни ҳурмат қиламан. Аммо ҳозир менинг вақтим. Бу менинг имкониятим. Мен бунга эришдим", — дея фикрини якунлади Мелиқўзиев.