Мелиқўзиев чемпионлик камари учун гонорарсиз ҳам жанг қилишга тайёрлигини айтди

WBA рейтингида ўз вазн тоифасида биринчи ўринни эгаллаб турган Бектемир Мелиқўзиев жаҳон чемпиони Хайме Мунгуяга қарши жанг ўтказиш истагини яна бир бор билдирди.

Ўзбекистонлик боксчи WBA камари учун мажбурий даъвогар ҳисобланади ва чемпионлик имкониятини қўлга киритиш учун гонорардан ҳам воз кечишга тайёрлигини маълум қилди.

"Жанг учун қанча пул тўланиши мен учун муҳим эмас. Текинга ҳам жанг қилишга тайёрман. Фақат менга ва белгиланган қоидаларга нисбатан ҳурматсизлик қилишни тўхтатинг.

Хайме Мунгуя, сен чемпионлик жангига чиқишингдан олдин ҳам мен мажбурий даъвогар эдим. Энди сен чемпионсан. Агар мен чемпион бўлганимда сенга ёки бошқа исталган боксчига қандай ҳурмат кўрсатган бўлсам, сендан ҳам худди шу муносабатни кутаман.

WBA’ни ва мухлисларни ҳурмат қил. Улар натижаси олдиндан маълум бўлган жангни эмас, ҳақиқий рақобатни кўришни хоҳлайди", деб ёзди Мелиқўзиев Instagram саҳифасида.

Хайме Мунгуя 2 май куни Лас-Вегасдаги "T-Mobile Arena"да Хосе Армандо Ресендисни очколар ҳисобида мағлуб этиб, WBA чемпионлик камарини қўлга киритган эди.

Унинг мажбурий ҳимояни ўтказиши учун ажратилган 120 кунлик муддат 30 август куни тугаган.

WBA қоидаларига мувофиқ, чемпион мажбурий ҳимоя муддати якунланишидан олдинги 60 кун давомида расмий мажбурий даъвогардан бошқа боксчи билан жанг ўтказа олмайди.

Агар Мунгуя ва Мелиқўзиев томонлари 21 октябрга қадар келишувга эриша олмаса ёки тарафлардан бири музокараларни давом эттиришни истамаса, WBA чемпионлик жанги ҳуқуқини аниқлаш учун промоутерлик аукциони ўтказиши мумкин.