Мексикада автомагистраль бўйида бошсиз жасадлар топилди

Мексика Миллий гвардияси ходимлари Халиско штатидаги Лагос-де-Морено ва Сан-Луис-Потоси шаҳарлари ўртасидаги йўлда беш нафар бошсиз жасадни топди. Жасадлар қора полиэтилен пакетларга ўралган ҳолда топилган. Яна бир сумкада уларнинг бошлари бор эди, аммо уларнинг ёшини ҳозирча аниқлаб бўлмайди, дея хабар беради Expansion politica.

Нашрнинг қайд этишича, Халиско штатида картеллар ва кучли тузилмалар ўртасидаги тўқнашувлар ва вандализм ҳаракатлари бир ойдан ортиқ вақтдан бери давом этмоқда. Бу ҳолат наркобарон Хоакин Гусманнинг ўғли Хоакин Гусман Лопес ва Синалоа картели асосчиси Исмоил Замбада Гарсия ҳибсга олинганидан кейин бошланган.

Маҳаллий ОАВ хабарларига кўра, тўқнашувлар икки гуруҳ – Хоакин Гусманнинг фарзандлари бошчилигидаги “Лос Чапитос” ва яқинда ҳибсга олинган Исмоил Замбада Гарсия бошчилигидаги “Лос-Майос” картели ўртасида кечмоқда.

Қайд этилишича, мамлакатда жамоат тартибини сақлаш учун армия ва Миллий гвардиянинг катта контингенти сафарбар этилган. Хусусан, Синалоа штатининг пойтахти Кулиакан шаҳрида жамоат тартибини сақлаш учун турли қуролли кучларнинг 22 минг аскари ва шахсий таркиби сафарбар этилган. “Espejo” журнали маълумотларига кўра, сўнгги бир ой ичида ушбу можаролар оқибатида 200 дан ортиқ киши ҳалок бўлган, 234 киши бедарак йўқолган.

Расмий маълумотларга кўра, жорий йилнинг январь-сентябрь ойлари орасида Халиско штатида 1415 киши ҳалок бўлган. 2006 йилда ҳукумат наркотик савдосига қарши кураш учун ҳарбийларни сафарбар қилганидан бери Мекcикада 450 мингдан ортиқ одам ҳалок бўлди, минглаб одамлар бедарак йўқолди.