Марко Рубио Исроил ва Ливан ўртасидаги можарони юмшатишга қаратилган янги ташаббусни илгари сурди

Маълум қилинишича, Марко Рубио сўнгги 48 соат ичида Ливан президенти Жозеф Аун ва Исроил бош вазири Бинямин Нетаняҳу билан музокаралар ўтказган.

АҚШ таклифига кўра, биринчи босқичда “Ҳизбуллоҳ” Исроилга қарши барча ҳужумларни тўхтатиши керак. Бунга жавобан Исроил ҳам Ливанга нисбатан ҳарбий ҳаракатларни кучайтирмаслик мажбуриятини олади. Америкалик расмийлардан бирининг таъкидлашича, бу қадамлар босқичма-босқич кескинликни камайтириш ва жанговар ҳаракатларни самарали тўхтатиш учун имкон яратади.

Al Jazeera xабарига кўра, Ливан президенти Жозеф Аун Қўшма Штатларнинг сулҳ таклифини қўллаб-қувватламоқда. Ливан парламенти спикери Набиҳ Берри эса “Ҳизбуллоҳ” ўт очишни тўхтатиш режимига риоя қилишини билдирган, бироқ сулҳнинг дастлабки қадамлари бўйича масъулиятни Исроил зиммасига юклаган.

АҚШ маъмурияти вакили “Ҳизбуллоҳ” Эрон сиёсатига эргашаётганини ва можаронинг давом этишидан манфаатдор эканини таъкидлаган. Унинг фикрича, Эрон Ливандаги зиддиятни чўзиш орқали кейинчалик можарони ҳал қилишдаги ролини намойиш этишга уринмоқда.

Шунингдек, АҚШ томони тинч аҳолига қарши ҳужумлар давом этаётган бир пайтда Исроил бунга чидаб туришини кутмаслигини билдириб, кескинликни пасайтиришнинг энг осон йўли “Ҳизбуллоҳ” томонидан зудлик билан ўт очишни тўхтатиш эканини қайд этган.