Ўзбекистон нечанчи ўринда? ЖЧнинг энг қиммат таркибга эга жамоалари маълум бўлди

Transfermarkt портали 2026 йилги Жаҳон чемпионатида иштирок этадиган терма жамоаларнинг умумий қийматларини эълон қилди. Унга кўра, Франция терма жамоаси футболчиларнинг трансфер қиймати бўйича биринчи ўринни эгаллаб турибди.

Қайд этилишича, “кўклар” таркибидаги футболчиларнинг умумий қиймати 1,48 миллиард еврога баҳоланган. Бу кўрсаткич бўйича иккинчи ўринни Англия терма жамоаси (1,31 миллиард евро), учинчи ўринни эса Испания терма жамоаси (1,27 миллиард евро) банд этган.

Энг қиммат таркибга эга терма жамоалар:

1. Франция (1,48 млрд евро)
2. Англия (1,31 млрд евро)
3. Испания (1,27 млрд евро)
4. Германия (998 миллион евро)
5. Португалия (957 миллион евро)
6. Бразилия (909 миллион евро)
7. Нидерландия (837 миллион евро)
8. Аргентина (816 миллион евро)
9. Норвегия (601 миллион евро)
10. Туркия (536 миллион евро)

Ўзбекистон миллий терма жамоасининг май ойидаги йиғинига жалб этилган 40 нафар футболчининг умумий трансфер нархи 78,73 миллион еврога баҳоланган. “Оқ бўрилар” ушбу кўрсаткич бўйича мундиалда иштирок этадиган жамоалар орасида 35-ўринда қайд этилган.

2026 йилги Жаҳон чемпионати 11 июндан 19 июлгача бўлиб ўтади. Турнир учрашувларига АҚШ, Канада ва Мексика биргаликда мезбонлик қилади. Бўлажак дунё биринчилигида тарихда илк бор 48 та миллий терма жамоа иштирок этади. Чемпионатнинг очилиш ўйини 11 июнь куни Мехикодаги “Ацтека” стадионида бўлиб ўтади ва унда Мексика ҳамда Жанубий Африка Республикаси (ЖАР) терма жамоалари ўзаро тўқнаш келади.

Маълумот учун, МТЖ мундиалдаги илк ўйинини Мексикада ўтказади, қолган икки учрашув эса АҚШдаги стадионларда бўлиб ўтади. “Оқ бўрилар” 18 июнь куни биринчи турда Колумбияга қарши майдонга тушади. Ушбу учрашувга Мексика пойтахтидаги “Ацтека” стадиони мезбонлик қилади.

Жамоа иккинчи тур доирасида 23 июнь куни Криштиану Роналду бошчилигидаги Португалия терма жамоаси билан ўйнайди. Мазкур беллашув АҚШдаги “Хюстон” стадионида ўтказилиши белгиланган. Гуруҳдаги сўнгги учрашув 28 июнь куни “Атланта” стадионида Конго Демократик Республикасига қарши бўлиб ўтади.