«Манчестер Сити» иши Британия ва БАА муносабатларига ҳам таъсир қилиши мумкин

Financial Times хабарига кўра, «Манчестер Сити»нинг Англия Премьер-лигасидаги давом этаётган иши кенгроқ сиёсий аҳамият касб этмоқда. Иш бўйича чиқарилиши мумкин бўлган қарорлар Буюк Британия ва БАА ўртасидаги муносабатларга салбий таъсир кўрсатиши эҳтимоли бор.

Бунга клуб раиси Ҳалдун Ал Муборакнинг Буюк Британиядаги 30 миллиард фунтлик мажбуриятларни ўз ичига олган суверен инвестиция ҳамкорлигини назорат қилиши ҳам сабаб бўлмоқда.

Ал Муборак 2020 йилдан буён Буюк Британияда дипломатик дахлсизлик мақомига эга. Ушбу мақом уни жиноий таъқибдан, шунингдек, аксарият ҳолатларда мамлакатдаги фуқаролик даъволаридан ҳимоя қилади.

Буюк Британия Қироллик прокуратура хизматида экстрадиция масалалари бўйича собиқ раҳбар Ник Вамоснинг тушунтиришича, Ал Муборак «жиноий таъқибдан тўлиқ ҳимояланган ва ўзининг «расмий вазифалари» билан боғлиқ фуқаролик даъволари бўйича дахлсизликка эга».

Шу сабабли «Манчестер Сити» ишидан кейин Ал Муборакнинг ўзига нисбатан Буюк Британия судлари орқали қандайдир ҳуқуқий чора кўришга уриниш жиддий тўсиқларга дуч келиши мумкин.

Financial Times нашри Ал Муборакнинг шахсан қонунбузарлик қилгани ҳақида ҳеч қандай даъво йўқлигини алоҳида таъкидлаган. Бироқ унинг мақоми билан боғлиқ дипломатик нозикликлар Англия футболининг энг бой клубларидан бири учун аллақачон катта аҳамият касб этаётган ушбу ишга яна бир мураккаб жиҳат қўшмоқда.