Малта сунъий интеллект тизимини бепул қилган дунёдаги биринчи давлатга айланди

Бугунги кунда сунъий интеллект ҳаётимизнинг ажралмас қисмига айланиб бормоқда. Бу борада Малта давлати дунёда биринчилардан бўлиб ўзига хос тарихий қадамни ташлади.

Малта ўз аҳолиси учун "ChatGPT Plus" хизматидан бепул фойдаланиш имкониятини тақдим этган дунёдаги илк давлатга айланди. Мамлакат ҳукумати бу борада "OpenAI" компанияси билан тегишли шартномани имзолади.

Мазкур келишувга кўра, Малта резидентлари "ChatGPT"нинг пулли версиясидан бир йил давомида мутлақо бепул фойдаланишлари мумкин. Бунинг учун фуқаролар ва резидентлардан Малтанинг онлайн идентификация тизимидан рўйхатдан ўтиш талаб этилади.

Бироқ бу ҳали ҳаммаси эмас. Фурсатдан унумли фойдаланишни истовчилар Малта университети томонидан ишлаб чиқилган "AI for All" ("Сунъий интеллект барча учун") деб номланган бепул онлайн курсни тамомлашлари керак бўлади. Шундан сўнггина аҳоли "ChatGPT Plus"дан бепул фойдаланиш учун ариза топшириш ҳуқуқини қўлга киритади.

Малта рақамли инновациялар бошқармасининг маълум қилишича, ушбу онлайн курс одамларга сунъий интеллектнинг мазмун-моҳиятини англаш ҳамда ундан уйда ва ишда қандай қилиб масъулият билан фойдаланишни тушунишга ёрдам бериш мақсадида ишлаб чиқилган. Лойиҳанинг илк босқичи шу йилнинг май ойида ишга тушади ва бошқарма бепул обуналарни тақсимлаш жараёнини қатъий назорат қилади.

Муҳим янгиликка Малта иқтисодиёт, тадбиркорлик ва стратегик лойиҳалар вазири Силвио Схембри ҳам муносабат билдирди:

"Ушбу таълим лойиҳасини бугунги кунда мавжуд бўлган энг илғор рақамли воситалардан бепул фойдаланиш имконияти билан бирлаштирган ҳолда, биз ҳали кўпчиликка нотаниш бўлган тушунчани оилаларимиз, талабаларимиз ва ишчиларимиз учун амалий ёрдамчига айлантирмоқдамиз", дейди вазир.