Мактаблар таълим маскани бўлиб қолиши, «жанг майдони»га айланмаслиги керак

Amnesty International Франция полициясининг куч ишлатишини танқид қилди.

Халқаро ҳуқуқ ҳимоя ташкилоти Amnesty International Франция ҳукуматини мамлакатда давом этаётган ўқувчилар намойишлари фонида полиция томонидан куч ишлатилишини чеклашга чақирди.

Ташкилот француз ҳокимиятидан таълим шароитларини яхшилашни талаб қилаётган ўқувчиларнинг намойишларида инсон ҳуқуқлари бўйича мажбуриятларга риоя қилишни ва полициянинг номутаносиб куч ишлатишига йўл қўймасликни сўради.

Amnesty International’нинг Франциядаги бўлими раҳбари Анн Савинель-Баррас ҳукумат намойишларда иштирок этаётган ёшларнинг хавфсизлигини таъминлаш ва уларнинг тинч намойиш ўтказиш ҳуқуқини ҳимоя қилиш учун масъул эканини таъкидлади.

Унинг қайд этишича, полициянинг ҳар қандай аралашуви қонуний, зарур ва вазиятга мутаносиб бўлиши керак. Шунингдек, полиция томонидан кўздан ёш оқизувчи газ ва резина таёқлар қўлланилаётгани ҳақидаги хабарлар сони ортиб бораётгани айтилди.

Франция Инсон ҳуқуқлари лигаси (LDH) ҳам намойиш иштирокчиларига нисбатан босим ўтказилаётганини қоралаб, мактаблар таълим маскани бўлиб қолиши, «жанг майдони»га айланмаслиги кераклигини билдирди.

Францияда 17 сентябрда бошланган ва мамлакатнинг турли шаҳарларига тарқалган ўқувчилар намойишлари давомида 200 га яқин ўқувчи ва 700 нафарга яқин хавфсизлик кучлари ходими жароҳатлангани хабар қилинди. Шунингдек, қарийб 30 та мактабга ўт қўйилган, 5 мингдан ортиқ шахсга нисбатан ҳуқуқий чоралар бошланган.