Макрон Исроилни огоҳлантирди: Ғазодаги гуманитар инқироз ҳал қилинмаса, ЕИ санкция киритиши мумкин

Эммануэль Макрон Фаластин давлатини тан олиш маънавий бурч ва сиёсий зарурат эканини билдирди.

Сингапурдаги "Шангри Ла диалоги” халқаро хавфсизлик анжуманида нутқ сўзлаган Франция президенти Фаластин давлатини тан олиш қатор шартларнинг бажарилиши билан бирга бўлиши кераклигини таъкидлади.

Макрон бу шартлар қаторида Фаластин давлати томонидан Исроилнинг яшаш ва хавфсизлик ҳуқуқининг тан олиниши, ҲАМАС ҳаракатининг қуролсизланиши, ҲАМАСнинг Фаластинни бошқаришда иштирок этишдан бош тортиши ва гаровга олинганларнинг озод қилинишини келтирди.

Шу билан бирга, Франция президенти агар Исроил яқин соатлар ва кунларда Ғазо секторидаги гуманитар вазиятга мақбул ечим таклиф қилмаса, халқаро ҳамжамият Тель-Авивга нисбатан қатъий умумий позицияни эгаллаши шартлигини билдирди.

"Бундай вазиятда Европа Иттифоқи ўз тамойилларига мувофиқ ҳаракат қилиши, инсон ҳуқуқларини ҳурмат қилишга асосланган жараёнларни якунлаши ва санкциялар жорий этиш имкониятларини кўриб чиқиши зарур. Биз қатъийроқ бўлишимиз керак, чунки бу ҳозир заруратга айланган. Лекин мен ҳали ҳам Исроилнинг позицияси ўзгаради ва гуманитар ечим топилади деб умид қиламан", — деди Эммануел Макрон.