Мадурони қўлга олишда қимлар қатнашди?

Мадурони қўлга олиш операциясида АҚШнинг 150 дан ортиқ жанговар ва разведкачи самолётлари, жумладан, F-35 қирувчилари ва B-1 русумли стратегик бомбардимончилари қатнашган — BBC.

АҚШ штаб бошлиқлари бирлашган қўмитаси бошлиғи генерал Дэн Кэйн президент Доналд Трамп билан қўшма матбуот анжуманида Венесуэла президенти Николас Мадурони қўлга олиш операцияси қандай ўтгани ҳақида гапириб берди. Операция 2 январдан 3 январга ўтар кечаси ўтказилган.

Кэйннинг сўзларига кўра, ушбу амалиётга тайёргарлик кўриш тахминан бир ой муқаддам бошланган. Ундан олдин эса разведкачилар узоқ вақт давомида иш олиб боришган: разведка Мадуро қаерда ва қандай яшаши, унинг одатлари ҳақида маълумот тўплаган. The New York Times манбаларига кўра, сунъий йўлдош ва дронлар орқали олинган маълумотлар Венесуэладаги, жумладан, Мадуронинг атрофидаги манбалар йиғган маълумотлар билан тўлдирилган.

3 январга ўтар кечаси президент Трампнинг шахсий буйруғи билан бир вақтнинг ўзида 20 та базадан ва авиаташувчилардан 150 дан ортиқ жанговар ва разведкачи самолётлар, жумладан, F-35 қирувчилари ва B-1 русумли стратегик бомбардимончилар ҳавога кўтарилган.

Кўп ўтмай амалиётга 160-махсус операциялар авиация полкининг CH-47 Chinook ва CH-53 Sea Stallion вертолётлари амалиётга қўшилган. Бу гуруҳ таркибида армиянинг Delta Force номли махсус топшириқли кучлари ҳамда адлия вазирлигининг кучишлатар бўлинмаси жангчилари Каракас томон учган. Бу амалиёт расман “оғир жиноятларда айбланаётган Николас Мадуро ва унинг рафиқаси Силия Флоресни қўлга олиш амалиёти” деб баҳоланган.

Вертолётлар денгиз устида 30 метр атрофидаги баландликда учишган. Улар Каракасга яқинлашганида, авиация кучлари қўлга олиш гуруҳи хавфсиз парвоз қилишини таъминлаш учун Ла-Гуайра портидаги, шунингдек, Венесуэла пойтахтини соҳилдан тўсиб турувчи Ла-Карлота ва Игерота аэропортларидаги ҳаво ҳужумидан мудофаа объектларига зарбалар йўллаган.

Шундан кейин қўлга олиш гуруҳи Венесуэла президенти қароргоҳига бостириб кирган. Ҳудуд осмонини АҚШ авиацияси назорат қилган, разведкачи самолётлар ердаги вазиятни кузатиб туришган. Delta Force махсус топшириқли кучлари Мадуро ва Флоресни уларнинг ётоқхонасида қўлга олишган, бу вақтда улар уйқуда эди.

Гуруҳ ортга қайтаётганида Мадуронинг қўриқчилари билан отишма келиб чиққан. Самолёт ва дронлар ҳаводан зарбалар йўллаган. Бир неча дақиқадан кейин қўлга олиш гуруҳи Мадуро ва рафиқасини вертолётга олиб чиққан ва воқеа жойидан учиб кетган. Америкалик ҳарбийлар орасида йўқотишлар йўқ, фақат бир неча киши жароҳат олган.

АҚШ президенти Доналд Трамп, давлат котиби Марко Рубио, мудофаа вазири Пит Ҳегсет, президентнинг ички хавфсизлик бўйича маслаҳатчиси Стивен Миллер ва маъмуриятнинг бошқа аъзолари, шунингдек, штаб бошлиқлари бирлашган қўмитаси раиси генерал Дэн Кэйн Трампнинг Флоридадаги қароргоҳида жиҳозланган махсус хонада Каракасда бўлаётган воқеаларни жонли эфирда кузатиб туришган.