Латвия чегарасида қуролланган шахслар ҳарбийларга таҳдид қилди ва кузатув камераларини ўғирлади

Латвия ички ишлар вазири Янис Домбрава Беларусь ҳудудидан Латвияга 20 нафар ноқонуний мигрантни олиб ўтишга уринган ниқобли қуролланган шахслар мамлакат ҳарбийларига таҳдид қилганини маълум қилди.

Унинг сўзларига кўра, Латвия ҳарбийлари чегарани ноқонуний кесиб ўтишга уринишнинг олдини олган. Беларусь томонида қолган қуролланган шахслар ҳарбийларга таҳдид қилган ва мигрантларни Латвия томон йўналтирган.

Бир неча соатдан кейин ниқобли шахслар Латвия ҳудудига кириб, электр тақсимлаш щитини шикастлаган ва кузатув камераларини ўғирлаган. Улар чегарачилар етиб келгунига қадар Беларусь ҳудудига қайтиб кетган.