Кремл тинчлик музокараларида АҚШнинг воситачилигидан умидвор

Кремл тинчлик музокараларида АҚШнинг воситачилигидан умидвор эканини билдирди.

"Ҳозирда сулҳ жараёни тўхтаб қолган, биз у барибир қайта тикланишига ва америкалик ҳамкасбларимиз ўз воситачилик ҳаракатларини давом эттиришига умид қиламиз", — дейди Кремл расмий вакили Дмитрий Песков.

Шу билан бирга, 13 май куни Песков "кенг қамровли тинчлик музокаралари" фақатгина Украина Қуролли Кучлари ўз қўшинларини Донбассдан олиб чиқиб кетганидан кейингина имконли бўлишини айтган эди.

Песков душанба куни, шунингдек, Россия ҳарбийлари фақат ҳарбий ва ҳарбий соҳага яқин бўлган нишонларга зарба бераётганини таъкидлади.

14 май куни Россия Киевга зарба берди, натижада турар жой биносининг бутун бир қисми вайрон бўлди, 24 киши ҳалок бўлди.

"Ўтган кечагача ҳаммаси яхши кўринаётганди, лекин украиналикларга катта зарба берилди", — дея ҳужумга муносабат билдирди АҚШ президенти Доналд Трамп (иқтибос Reuters’дан) ва бу воқеа тинчлик жараёнини қийинлаштириши мумкинлигини тахмин қилди.