Конгода Эбола эпидемияси тарқалиши оқибатида 80 киши вафот этди

Эбола безгаги Конго Демократик Республикасининг шимоли-шарқидаги Итури провинциясида тарқалди.

Бу ҳақда мамлакат Соғлиқни сақлаш вазирлиги хабар бермоқда.

Маълумотларга кўра, вирусни юқтирганликда гумон қилинаётган жами 246 та ҳолат қайд этилган. Улардан бири Буниа шаҳридаги Инжил тиббиёт марказида содир бўлган бўлиб, у ерда безгак, қон кетиши, қусиш ва қаттиқ ҳолсизлик каби симптомлар кузатилган ҳамшира вафот этган.

Конго ҳукумати тезкор марказ очилганини ва эпидемиологик назорат кучайтирилганини эълон қилди. Африка касалликларни назорат қилиш ва олдини олиш марказлари (Africa CDC) трансчегаравий назоратни кучайтириш мақсадида Конго Демократик Республикаси, Уганда, Жанубий Судан ва глобал ҳамкорлар иштирокида фавқулодда йиғилиш ташкил қилаётганини билдирди.

Дастлабки натижалар шуни кўрсатмоқдаки, вируснинг ушбу штамми аввал қайд этилган ва ҳозирги даволаш усуллари ҳамда вакциналар асосан унга қарши ишлаб чиқилган "Заир" штаммидан фарқ қилади.

Маълумот учун, жорий эпидемия — 1976 йилда Эбола вируси аниқланганидан бери Конгода содир бўлаётган навбатдаги 17-офатдир. Касаллик Итури провинциясидаги этник тўқнашувлар ва ресурслар учун кураш сабабли юзага келган оғир гуманитар вазият ҳамда зўравонликлар фонида тарқалмоқда.