Кения полицияси мамлакат марказида жойлашган Нанюки шаҳрида Эболага чалинган АҚШ фуқаролари учун карантин маркази қурилишига қарши ўтказилган намойишни тарқатиш учун кўздан ёш чиқарувчи газ қўллади.
Гувоҳларнинг маълум қилишича, намойишчилардан бири бош қисмига ўқ тегиши оқибатида ҳалок бўлган. Reuters агентлиги намойиш ташкилотчиларига таяниб хабар беришича, жабрланувчи воқеа жойида вафот этган.
Қўлларида Кения байроқлари, турли баннерлар ҳамда ён томонига қизил ҳарфлар билан «Эбола» деб ёзилган оқ тобут кўтарган намойишчилар карантин маркази қурилишини бекор қилишни талаб қилдилар.
Ўтган ҳафта ҳам полиция худди шундай намойишларни куч билан тарқатган эди. Ўшанда икки киши ўқ тегиши оқибатида ҳалок бўлган.
Норозиларнинг таъкидлашича, уларни Эбола касаллигининг мамлакатга кириб келиши ва тарқалиши эҳтимоли, шунингдек ҳукуматнинг мазкур марказ фаолияти бўйича аниқ маълумот бермаётгани ташвишга солмоқда.
Май ойида Кения Олий суди карантин марказини ишга туширишни вақтинча тўхтатиш ҳақида қарор чиқарган эди. Судга мурожаат қилган инсон ҳуқуқлари ташкилотлари марказ аҳоли учун «жиддий ва муқаррар хавф» туғдириши мумкинлигини билдирган.
Намойишчилардан бири Присцилла Имани Reuters агентлигига берган интервьюсида мазкур лойиҳа Нанюки шаҳри ва бутун Лайкипия округи иқтисодиётига салбий таъсир кўрсатаётганини айтди.
«Одамлар бу ерга келишдан қўрқмоқда. Лайкипия чиқиндихона эмас ва бизнинг овозимиз эшитилиши керак», — деди у.
Миллион россиялик мамлакатни тарк этди
Ўзбекистон – Нидерландия ўртоқлик ўйини Нью-Йоркда бўлиб ўтади
47°C иссиқликда тонг ҳам, тун ҳам йўқ: Ҳиндистоннинг энг иссиқ ҳудудида бир кун
