Камчаткада 7,6 балллик зилзила: аҳоли огоҳлантирилди, цунами хавфи бор

20 июль куни Россиянинг Камчатка ўлкасида Тинч океани акваториясида бир неча кучли зилзилалар рўй берди. Энг кучлиси — 7,6 балл магнитудали зилзила бўлиб, Петропавловск-Камчатский шаҳридан 115 км шарқда содир бўлди. У 17 км чуқурликда қайд этилган.

Бошқа бир зилзила ҳам шу минтақага яқин ҳудудда содир бўлган — унинг магнитудаси 7 баллни ташкил этди.

Зилзилалар таъсири Камчатканинг бир нечта туман ва шаҳарларида, жумладан, Петропавловск-Камчатский, Вилючинск ва Елизовскийда 5–7 балл даражасида сезилди.

Сейсмологлар цунами хавфини истисно қилмаяпти. Ҳисоб-китобларга кўра:

• Алеутск округига 60 см гача тўлқин,

• Усть-Камчатскка 40 см,

• Петропавловск-Камчатскийга эса 15 см гача тўлқин етиб келиши мумкин.

МЧС аҳолига соҳилдан олисроқ, баланд жойларга чиқишни тавсия қилди. Соҳилга яқинда турган кемаларга эса океан томонга йўл олиш топширилди.

Камчатка губернатори Владимир Солодовга кўра, цунами хавфини аниқлаш тизими ўз вақтида ишга туширилган ва ҳозирча катта вайронагарчилик ёки жабрланганлар қайд этилмаган.