Жодугарлар овими? — АҚШда катталар қўзғалди. Маск ва Трампдан Францияга ҳужум

Трамп, Маск ва Вэнс ўта ўнг партия етакчиси Марин Ле Пенга оид суд қароридан сўнг Францияни танқид қилди.

"Бу менга қарши ишлатилган ўша сценарий асосида амалга оширилмоқда. Суд қарори “жодугарлар овининг” намунаси ва Европа сўлларининг суд тизимидан сўз эркинлигини бўғиш ҳамда сиёсий рақибларини цензура қилиш учун фойдаланишини кўрсатувчи ҳолатдир", — деб ёзди АҚШ президенти Доналд Трамп Truth Social платформасида.

Трампнинг бу баёнотини Илон Маск репост қилди ва "Ле Пенга эркинлик!" деб изоҳ қўшди.

Қўшма Штатлар висе-президенти Жей Ди Вэнс эса, агар Европа мамлакатлари мухолифат етакчиларини қамашда давом этса, у ҳолда АҚШ ва Европа ўртасидаги муносабатлар кескинлашишини айтди.

"Франция адлия тизимидан қўлингизни тортинг, жаноб Трамп!", — дея жавоб берди Франциянинг денгизорти ҳудудлари бўйича вазири Мануел Валс. Унинг сўзларига кўра, америкалик сиёсатчиларнинг қўллаб-қувватлаши Марин Ле Пенга ёрдам бермайди. Валснинг фикрича, бу ҳолат халқаро ўта ўнг ҳаракат мавжудлигини ва у жамоат муҳокамаларига таъсир ўтказишга уринаётганини кўрсатади.

Эслатиб ўтамиз, 31 март куни Франциянинг ўта ўнг “Миллий бирлашув” партияси етакчиси Марин Ле Пен Европа Иттифоқи маблағларини ўзлаштириш ва партияни яширин молиялаштиришда айбдор деб топилганди. Париж суди Ле Пенга нисбатан тўрт йил шартли равишда озодликдан маҳрум қилиш ва 100 минг евро жарима тўлаш жазосини тайинланган. Шунингдек, унга беш йил мобайнида сайловларда иштирок этиш тақиқланган.